د افغانستان د ملي امنیت پخوانی مشر اسدالله خالد وايي چې د را روانو ټاکنو لپاره نهه میلیونه خلکو نوم لیکنه نه ده کړې.
ښاغلي خالد ادعا وکړه چې د رایې ورکوونکو د نوم لیکنې په پروسه کې له دوو میلیونو څخه زیات کسان ندي ثبت شوي "څوک په دې باور لري، چې ۹ میلیونه تذکرې دې په رښتیا هم توزیع شوې وي او هم دې سټیکر شوې وي".
نوموړي دا څرګندونې د پنجشنبې په ورځ (زمري ۱۱) په کابل د 'امید سبا' په نوم د خپل نوي سیاسي خوځښت د اعلانولو پر مهال وکړې.
ښاغلي خالد د افغان حکومت او د ټاکنو کمیسیون پر برنامو کلکې نیوکې وکړې او وې ویل، چې د افغانستان امنیتي وضعیت، د قومونو ترمنځ یووالی، سیاسي ثبات او ټاکنې د بل هر وخت په پرتله په خراب وضعیت کې دي.
اسدالله خالد د شفافو ټاکنو په ترسره کولو ټینګار وکړ او وې ویل، چې په راتلونکو ټاکنو کې درغلۍ به افغانستان له نوي سیاسي بحران سره مخ کړي.
تر دې مخکې د افغانستان د ملي امنیت دوو نورو مشرانو امرالله صالح او رحمت الله نبیل هم د نوملیکنې پر بهیر شک ښودلی او له نړیوالې ټولنې یې غوښتي وو چې په دې اړه پلټنې وکړي.
په افغانستان کې د ولسي جرګې او ولسمشرۍ ټاکنو په رارسیدو سره، د سیاسي خوځښتونو او ائتلافونو جوړولو هم زور اخیستی دی.
تیره اونۍ د جنبش، جمعیت او وحدت ګوندونو په ګډون د 'افغانستان لوی ملي ائتلاف' د خپل موجودیت اعلان کړ.
په دغه ائتلاف کې یو شمیر سیاسي خوځښتونه هم شامل دي.