د لاس رسي وړ اتصالات

تیره یوه میاشت کې ۱۸۸ ملکي افغانان په جګړو کې وژل شوي


د افغانستان د عامې روغتیا د وزارت د راپور له مخې د کابل د اپریل د میاشتې په دوو بریدونو کې د ماشومانو په ګډون ۸۰ تنه وژل شوي وو.

د ملکي وګړو د خونديتوب او عدالت غوښتنې ګروپ "سي اې پي جي " وايي، په تیره میلادي میاشت کې د افغانستان په ۲۳ ولایتونو کې په امنیتي پیښو کې ۱۸۸ ملکي وګړي وژل شوي او ۳۰۶ نور ټپیان شوي دي.

"سي اې پي جي "د ملکي افغانانو د مرګ ژوبلې په اړه د اپریل د میاشتې په خپل راپور کې چې نن د چهارشنبې په ورځ خپور کړی، ویلي چې په تیره میلادي میاشت کې زیات ملکي تلفات په کابل کې په دوو تروریستي بریدونو کې پیښ شوي دي.

د ملکي وګړو د خونديتوب او عدالت غوښتنې ګروپ"سي اې پي جي " چې هره میاشت په افغانستان کې د ملکي وګړو د مرګ ژوبلې په اړه رپوټونه خپروي، په خپل تازه راپور کې ویلي، چې تیره میاشت د کابل په لودیځه خوا د دشتې برچي د "قلعه ناظر" په سیمې په ځانمرګي برید کې ۵۷ ملکي وګړي وژل شوي او ۱۱۹ نورټپیان شوي وو.

د دغه راپور له مخې د روان میلادي کال په لومړیو څلور میاشتو کې په افغانستان کې تر ټولو زیات ملکي تلفات د اپریل په میاشت کې پیښ شوي دي.

د دغه راپور له مخې د مارچ په میاشت کې د ملکي وګړو د مرګ ژوبلې شمیر ۴۴۳ تنو ته رسیدلی وو.

د اپریل په میاشت کې په کابل کې د اسلامي دولت یا داعش د وسله والې ډلې له خوا په دوهم برید کې د نهو خبریالانو په ګډون۲۲ تنه ووژل شول او ۴۷ نور ټپیان شول.

د "سي اې پي جي "د راپور له مخې په تیره میلادي میاشت کې له کابل وروسته په زیات شمیر ملکي وګړو ته مرګ ژوبله د کندز ولایت دشت ارچي په ولسوالۍ کې په یوه مدرسه د افغان ځواکونو په هوايي برید کې پيښه شوې ده.

د ملکي وګړو د خونديتوب او عدالت غوښتنې ګروپ وايي، په دغه بمبارۍ کې پنځوس ملکي وګړي وژل شوي، چې شل تنه یې ماشومان دي.

همداشان د دغه ګروپ د راپور له مخې په کندز کې ۷۰ تنه نور ملکي وګړي ټپیان شوي هم دي.

"سي اې پي جي " ګروپ کې تر شلو پورې غیرې حکومتي ادارې او مدني ټولنې بنسټونه شامل دي.

افغان حکومت په کندز کې په دومره شمیر د ملکي وګړو مرګ ژوبله نه مني او وایي، ژر به په دې اړه خپل راپو خپور کړي.

افغان حکومت تر اوسه د کندز د دشت ارچي په بمبارۍ د اوو تنو وژل کیدل او د شاوخوا پنځوسو نورو ټپي کیدل تائید کړي دي.

د ملکي وګړو د خونديتوب او عدالت غوښتنې ګروپ، سربیره په افغانستان کې د ملګرو ملتونو د مرستندویه پلاوي دفتر هم په دغه هیواد کې د ملکي وګړو د خوندیتوب په اړه درې میاشتني راپورونه خپروي.

یوناما لا د ملکي تلفاتو په اړه د روان میلادي کال د لومړیو دریو میاشتو راپور نه دی، خپور کړی.

په افغانستان کې هرکال په پسرلي کې د هوا په ګرمیدو د افغان حکومت او د حکومت د وسله والو مخالفانو ترمنځ جګړې زور اخلي، چې له امله یې ملکي وګړي هم ز یان ویني.

XS
SM
MD
LG