د لاس رسي وړ اتصالات

اسټرالیا په لومړي ځل د اسیا د فوټبال اتلولي وګټله


اسټرالیا په پایلوبه کې جنوبي کوریا ته دوه-یوه ماتې ورکړه او په لومړي ځل یې د اسیا اتلولي وګټله.

د اسیا د فوټبال سیالیو له شاوخوا یوې میاشتې راهیسې په اسټرالیا کې روانې وې چې د شنبې په ورځ کوربنې لوبډلې، جنوبي کوریا ته دوه-یوه ماتې ورکړه او د اسیا د ملتونو جام یې په لومړي ځل پورته کړ.

د دغو دواړو لوبډلو ترمنځ لوبه ډېره په زړه پورې وه، لوبه په ټاکلو شویو ۹۰ دقیقو کې یوه-یوه مساوي شوه، خو اسټرالیايي لوبغاړي جیمز توري په ۱۰۵ دقیقې کې پر جنوبي کوریا دویم ګول وکړ او خپله لوبډله یې اتله کړه.

د جنوبي کوریا او اسټرالیا ترمنځ پایلوبه په سډنې کې وشوه چې لسګونه زره خلکو یې ننداره وکړه، له پیله داسې وړاندوینې کېدې چې شاید اسټرالیا د خپل کوربتوب او خپلو بې شمېره ملاتړو او مینوالو له موجودیت نه په ګټې اخیستنې سره په لومړي ځل د اسیا د دغو سیالیو اتله شي.

د دغو سیالیو په نورو لوبو کې بیا، متحدو عربو اماراتو عراق ته دوه-درې ماتې ورکړه او درېیم مقام یې وګاټه.

دغو سیالیو ته د اسیا د څه باندې ۴۰ لوبډلو له منځه ۱۶ یې دغه جام ته لاره وکړه، افغانستان هم په ۲۰۱۴ کال کې هڅه وکړه چې دغه جام ته ووځي خو، د غوراوي په لوبو کې د فلسطین په وړاندې ماتو یې د ورتګ مخه ډب کړه.

د سیالیو ۱۶ لوبډلې په څلورو ګروپونو وېشل شوې وې، جنوبي کوریا او اسټرالیا په الف ګروپ کې و چې، کوریا په ګروپي لوبو کې اسټرالیا ته یو صفر ماتې ورکړې وه.

د اسیا جام سیالیو تاریخ

د اسیال د ملتونو د جام سیالۍ په لومړي وار په ۱۹۵۶ میلادي کال کې په هانک کانګ کې وشوې، چې جنوبي کوریا یې اتله شوه، جنوبي کوریا دوه وارې د دغو سیالیو اتلولي خپله کړې ده.

د اسیال جام په هرو څلورو کلونو کې یو وارې کیږي.

جاپان څلور وارې د اسیا د ملتونو جام ګټلی دی چې وروستی یې د ۲۰۱۱ کال اتلولي وه، خو په روانو سیالیو کې متحدو عربو اماراتو په منځلوبې کې په پنالټۍ کې پنځه- څلور ماتې ورکړه.

سعودي او ایران بیا درې درې وارې، عراق او کویټ بیا یو یو وارې د اسیا د ملتونو د جام اتلان شوي دي.

  • 16x9 Image

    جعفر هاند

    جعفر هاند په ۲۰۱۷ کې په واشنګټن ډي سي کې په امریکايي پوهنتون کې په نړیوالو مطبوعاتو او اړیکو کې ماستري کړې ده. لومړۍ ماستري یې په ۲۰۱۳ کال کې (له لېرې واټن- Distance Learning) د هند په اندرا ګاندي پوهنتون کې په سیاسي علومو کې کړې ده. د ننګرهار په پوهنتون کې یې قضا لوستې ده. له ۲۰۰۷ نه تر ۲۰۱۴ کاله پورې د بي بي سي د نړیوالې او افغان څانګې خبریال او پروډیوسر و. د ۲۰۱۴ کال له پیل راهیسې په واشنګټن کې د امریکا غږ اشنا راډیو/تلویزون خبریال دی. 

XS
SM
MD
LG