د لاس رسي وړ اتصالات

د اماراتو استخبارات نوروز او شاپور ته ویزې نه ورکوي


نوروز منګل او شاپور ځدراڼ د افغان کرېکټ لوبډلې دوه پخواني او تجربه لروونکي لوبغاړي بلل کیږي.

د افغانستان د کرېکټ بورډ چارواکي وايي د متحدو عربي اماراتو ملي امنیت پرېکړه کړې چې نوروز منګل او شاپور ځدراڼ ته به ویزې نه ورکوي.

د کرېکټ بورډ اجرايي رئیس شفیق الله ستانکزي امریکا غږ ته وویل" د متحدو عربو اماراتو د کډوالو د چارو ریس، د لوبډلې مدیر بشیر ستانکزي ته ویلي چې ملي امنیت نوروز منګل او شاپور ځدراڼ ته د ویزو د نه ورکولو پرېکړه کړېده. "

ښاغلي ستانکزي وویل چې متحدو عربو اماراتو په رسمي ډول د خپلې دغې پرېکړې علت ندی ښودلی، خو په تېر وخت کې هم دغه دواړه لوبغاړي د اماراتو د ویزو په اخیستلو کې له ستونزو سره مخامخ شوي وو.

ښاغلي ستانکزي وویل " له تېرو دوو کلونو راهیسې موږ د نوروز منګل او شاپور ځدراڼ لپاره د متحدو عربي اماراتو د ویزو په اخیستلو کې له ستونزو سره مخامخ یو، خو دا وارې ستونزه بیخي لویه شوې ده او خبر تر استخباراتو ورسیده خو علت یې ندی معلوم. "

نوروز منګل او شاپور ځدراڼ د افغان کرېکټ لوبډلې دوه پخواني او تجربه لروونکي لوبغاړي بلل کیږي.

دوی اوس په افغانستان کې دي او د ویزو د نه ترلاسه کولو له کبله په متحدو عربي اماراتو کې له ایرلنډ او سکاټلنډ سره له څلورو نړیوالو لوبو پاتې شول.

ښاغلي ستانکزي وویل چې دوی دغه ستونزه د افغانستان د جمهوري ریاست تر دفتره هم رسولې ده، خو تراوسه یې د حل کېدو، کوم څرک نه لګي.

اوس به دغه دواړه ښاغلي مخامخ اسټرالیا ته ځي چې په نړیوال جام کې د افغانستان استازیتوب وکړي، ښاغلي ستانکزي په دې اړه څه و نه ویل چې نوروز منګل او شاپور ځدراڼ استرالیا ته پر لار د متحدو عربي اماراتو په کوم هوايي ډګر کې د د لږ وخت لپاره د تم کیدو اجازه لري او که نه؟

دا لومړی ځل دی چې کوم افغان لوبغاړی له دا ډول ستونزې سره مخامخ کیږي.

د افغانستان د کرېکټ ملي لوبغاړو په تېرو شاوخوا لسو کلونو کې د نړۍ د پنځو لویو وچو بېلا بېلو هېوادونو ته سفرونه کړي دي، خو متحدو عربي اماراتو ته یې تګ راتګ ځکه زیات دی چې هلته یو نړیوال لوبغالی د افغانستان لپاره ځانګړی شویدی او که بل هر هیواد د افغانستان سره لوبه لري، نو اماراتو ته په آسانۍ سره تلی راتلی شي.

په همدې حال کې نن افغان ملي لوبډله د سکاټلند لوبډلې سره خپله دویمه لوبه کوي. افغانستان خپل لومړۍ لوبه د سکاټلند نه ګټلې او په آیرلنډ یې بایللې ده. سکاټلند بیا دواړه لوبې بایللي خو پدې سیالیو کې بیا آیرلنډ خپلې دواړه لوبې ګټلي دي.

  • 16x9 Image

    جعفر هاند

    جعفر هاند په ۲۰۱۷ کې په واشنګټن ډي سي کې په امریکايي پوهنتون کې په نړیوالو مطبوعاتو او اړیکو کې ماستري کړې ده. لومړۍ ماستري یې په ۲۰۱۳ کال کې (له لېرې واټن- Distance Learning) د هند په اندرا ګاندي پوهنتون کې په سیاسي علومو کې کړې ده. د ننګرهار په پوهنتون کې یې قضا لوستې ده. له ۲۰۰۷ نه تر ۲۰۱۴ کاله پورې د بي بي سي د نړیوالې او افغان څانګې خبریال او پروډیوسر و. د ۲۰۱۴ کال له پیل راهیسې په واشنګټن کې د امریکا غږ اشنا راډیو/تلویزون خبریال دی. 

XS
SM
MD
LG