د افغان حکومت یوه باوري سرچینه وايي چې د دغه حکومت استازي به د جمعې په ورځ ( لړم ۳مه) په مسکو کې د افغانستان په هکله د امریکا، روسیې، چین او پاکستان د استازو په ګډه مشورتي ناسته کې ګډون ونه کړي.
دغې سرچینې امریکا غږ ته وویل چې دا ناستې د دغو هیوادونو خپلمنځي مشورتي ناستې دي او د افغان حکومت له اړخه په کې څوک برخه نه اخلي.
ټاکل شوې سبا د جمعې په ورځ په مسکو کې د افغانستان د سولې په مسله د امریکا، روسیې، چین او پاکستان د حکومتونو استازي په یوه مشورتي ناسته کې ګډون وکړي.
تراوسه لا د مسکو د ناستې په اړه ډیر جزئیات رسنیو سره شریک شوي نه دي.
ټاکل شوې په ناسته کې د افغانستان د پخلاینې لپاره د امریکا ځانګړی استازی زلمي خلیلزاد هم برخه واخلي.
ښاغلي خلیلزاد د روانې میاشتې په شلمه د سولې ماموریت بیرته پیل کړی دی.
د امریکا د بهرنیو چارو وزارت د اعلامیې له مخې ښاغلی خلیلزاد به د خپل دغه سفر په ترڅ کې له مسکو هم لیدنه وکړي.
هغه له وړاندې د دبیلجیم په پایتخت بروسل کې د ناټو د عمومي منشي ینس سټولټنبرګ او د اروپايي ټولنې له استازو سره په جلا جلا غونډو کې د افغانستان د سولې په مسله خبرې کړي دي.
د ناتو عمومي منشي د چهارشنبې په ورځ خبریالانو ته وویل، چې ناتو د طالبانو او امریکا ترمنځ د خبرو د بیا پیالیدو ملاتړ کوي.
هغه له طالبانو وغوښتل، چې د سولې میز ته د ستنیدلو پر مهال دې په واقعي ډول په خپل دریځ کې نرمښت راولي.
په مسکو کې دا مشورتې ناسته په داسې حال کې جوړیږي، چې چین د روانې میلادي میاشتې په ۲۹ مه او ۳۰ مه په دغه هیواد کې د بین الافغاني غونډې د جوړیدلو بندوبست کړی دی.
د چین د بهرنیو چارو وزارت یوې ویاندې د چهارشنبې په ورځ وویل، چې په دغه غونډه کې به ګډون کوونکي یوازې د خپلو ځانونو استازیتوب وکړي.
طالبانو ویلي، چې په پام کې لري، چې د دغې ډلې د سیاسي چارو د مرستیال ملا عبدالغني برادر په مشرۍ یو پلاوی به په غونډه کې ګډون وکړي. خو افغان حکومت وايي لا یې د چین بین الافغاني غونډه کې د ګډون پریکړه نه ده کړې.
په کابل کې سرچینې وايي، دغې غونډې ته شاوخوا دیرش افغان سیاسي، ټولنیز او قومي مشران وربلل شوي دي.