د لاس رسي وړ اتصالات

افغان حکومت د شلو ورځو لپاره وټس اپ او ټیلیګرم بندوي


دا لومړی ځل دی چې افغان حکومت په رسمي ډول ددوو ټولنیزو رسنیو فعالیت ځنډوي.
دا لومړی ځل دی چې افغان حکومت په رسمي ډول ددوو ټولنیزو رسنیو فعالیت ځنډوي.

د افغانستان د مخابراتو او معلوماتي ټکنالوژۍ وزارت وايي د وټس اپ او ټیلیګرم د ټولنیزو رسنیو د بندولو په اړه پریکړه یې د افغان حکومت ذ امنیتي ادارو په غوښتنه کړې ده.

د دې پریکړې له مخې به د شلو ورځو لپاره په افغانستان کې د وټس اپ او ټیلیګرم ټولنیزو رسنیو څخه کاراخیستل وځنډول شي.

د افغانستان د مخابراتي خدمتونو د تنظیم د ادارې "اترا"یو چارواکي د نوم د نه ښودلو پر شرط امریکا غږ اشنا راډیو ته وویل چې دا پریکړه د امنیتي اندیښنو له مخې شوې، چې یوازې د شلو ورځو لپاره به د ټولو مخابراتي شرکتونو له خوا عملي شي.

دغه چارواکي وویل په دې هکله وروستۍ پریکړه به سبا ته د شنبې په ورځ اعلان شي.

که څه هم د جمعې په ورځ په افغانستان کې د دغو دواړو ټولنیزو رسنیو په واسطه د پیغامونو لیږد رالیږد دوام درلود، خو د "افغان ټلې کام شرکت"چې نیم دولتي شرکت دی، یو شمیر مشتریانو امریکا غږ اشنا راډیو ته ویلي چې د پیغامونو په لیږد رالیږد کې یې ستونزې لرلې.

د افغان حکومت د رسمي اعلان وړاندې ددغو دوو ټولنیزو رسنیو د فعالیت د ځنډ خبرونه په ټولنیرو رسنیو کې خپاره شوي وو.

په ټولنیزو رسنیو کې له د افغانستان د مخابراتي خدمتونو د تنظیم د ادارې "اترا"مرستیال انجینر نقیب الله سیلاب په لاسلیک د انټرنیټي خدمتونو د برابرولو یوې ادارې " یونین ټلې کام" شرکت ته د تلې پر ۳۰ مه ورځ او بیا د لړم د میاشتې په لسمه د پنجشنبې په ورځ مکتوبونه استول شوي او ور څخه پرته د ځنډ څخه د شلو ورځو لپاره د وټس اپ او ټیلیګرام د ټولنیزو رسنیو د بندولو غوښتنه شوې ده.

همداشان دغه شرکت ته په دغه استول شوي یومکتوب کې غوښتل شوي چې د لیست له مخې دې په لیست کې د شاملو اشخاصو د انټرنیټي پاڼو، د ټویټر او فیسبوک د حسابونه بند کړي.

خو د دغو اشخاصو نومونه نه دي په ډاګه شوي.

دا لومړی ځل دی چې افغان حکومت په رسمي ډول ددوو ټولنیزو رسنیو فعالیت ځنډوي.

د بیان د ازادۍ د ملاتړو ادارو غبرګون

پر وټس اپ او ټیلیګرام ټولنیزو رسنیو د افغان حکومت له خوا د بندیز پریکړه، د بیان د ازادۍ او د رسنیو د ملاتړ ادارو د غبرګون سره مخ شوې ده.

د " نی" په نوم په افغانستان کې د رسنیو د ملاتړ د ادارې یو چارواکي محمد صابر فهیم امریکا غږ اشنا راډیو ته وویل چې د حکومت پریکړې باید د قانون په چوکات کې وي او له قانونه بهر پریکړې د رسنیو ملاتړ ادارو ته د منلو نه دي.

ښاغلي فهیم وویل " هر هغه عمل چې د بیان ازادي محدوده کړي مونږ به یې پر وړاندې ودریږو".

د افغانستان د مخابراتو او ټکنالوژۍ وزارت وضاحت

د افغانستان د مخابراتو او ټکنالوژۍ وزارت په یوه اعلامیه کې د وټس اپ او ټیلیګرام په کارولو د بندیز په اړه وضاحت ورکړی او د دې لنډ مهالې بندیز هدف یې تخنیکي ستونزې ګڼلي دي.

د دې اعلامیې له مخې د مخابراتو او معلوماتي ټکنالوژۍ وزارت په پام کې لري چې د دغو دواړو اپلیکشنونو د ښه فعالیت او د تخنیکي ستونزو د حل لپاره د مخابراتي شبکو سره یوه نوې ټکنالوژۍ شریکه کړي.

"د دې لپاره چې د دې سیستمونو کار و ازمویل شي، لازمه ده چې د یوې لنډې مودې لپاره په تدریجي ډول د وټس اپ او ټیلیګرام اپلیکشنونونو فعالیت متوقف شي. له همدې امله د افغانستان د مخابراتي خدمتونو د تنظیم ادارې (اترا) ته هدایت شوی چې په دې اړه اقدام وکړي".

د مخابراتو او ټکنالوژۍ وزارت دا لنډ مهالې بندیز تخنیکي ګڼلی او ویلي دي چې دا اقدام په هیڅ ډول ذ بیان ازادي نه محدوده وي.

"وټس اپ او ټیلیګرام یواځې د اړیکو نیولو او غږیزو پیغامونو لېږلو اپلیکېشنونه دي او د بیان ازادي نه زیانمنوي. حکومت د بیان ازادۍ ته کاملا ژمن دی او دا د خلکو مدني حق بولي".

په افغانستان کې د انټرنیټي خدمتونو د پراختیا سره په دغه هیواد کې د ټولنیزو رسنیو څخه کاراخیستل هم زیات شوي دي.

د افغانستان د مخابراتو او معلوماتي ټکنالوژۍ د معلوماتو له مخې اوس په افغانستان کې تر شپږ میلیونو پورې خلک انټرنیټ ته لاس رسی لري، چې د نورو ټولنیزو رسنیو پرتله د فیسبوک د کارونکو شمیر خورا زیات دی.

XS
SM
MD
LG