د لاس رسي وړ اتصالات

مس عینک لوبډلې د افغانستان د کرکټ اتلولي وګټله


نوروز منګل، د مس عینک د لوبډلې مشر و.

له شاوخوا یوې میاشتې راهیسې په افغانستان کې د کرکټ د پنځو زونونو ترمنځ د څلور ورځنیو لوبو سیالۍ پیل شوې وې.

د دغو سیالیو پایلوبه په کابل کې د سپین غر د زون او مس عینک د زون ترمنځ وشوه چې مس عینک اتلولي وګټله. د مس عینک زون، د تېر سیالیو اتل و.

د مس عینک د لوبډلې نوروز منګل او د سپین غر د زون مشر شبیر نوري و.

مس عینک پچه وګټله خو، سپین غر زون يې منډو جوړولو ته وباله، سپین غر زون په خپلې لومړۍ پاڼۍ کې ١٧٥ منډې وکړې چې د مس عينک لوبـډلې يې په ځواب کې ٢٦٥ منډې وکړې.

سپین غر لوبډلې په دویمې پاڼۍ کې یوازې ١٥٧ منډې وکړې او مس عينک لوبډلې ته يې فقط د ٦٨ منډو هدف وټاکه چې په اسانۍ سره یې پوره او اتلولي یې وګټله.

په دغو سیالو کې د بست، بند امیر او امو زونونو لوبډلې هم وې، دغه لوبې په کابل ننګرهار او خوست کې وشوې.

د لوبې غوره لوبغاړی عبید کونړی شو، ده اووه لوبغاړي وسوځول.

د لوبې جایزې

پر دې سربېره اتلې لوبډلې ته ١٥٠ زره افغانۍ او دویمې لوبډلې ته ۸۰ زره افغانۍ ورکړل شوې .

د دغو سیالیو هدف د کورني کرکټ وده او ملي لوبډلو ته د نویو استعدادونو موندل ښودل کیږي چې د کرکټ بورډ په خبره یو شمېر نوي لوبغاړي يې په نښه کړل چې په ځینو را روانو سیالیو کې به ورته په نړیوالو لوبو کې د لوبېدو چانس ورکړل شي.

افغانستان داسې مهال د کورني کرکټ سیالۍ پای ته ورسولې چې په پام کې ده په بلې اوونۍ کې د افغانستان د کرکټ ملي لوبډله زمبابوې ته ولاړه شي.

افغانستان له زمبابوې سره پنځه یوه ورځنۍ او دوه د ۲۰ اورونو نړیوالې لوبې کوي، په دغو لوبو کې یوه تر ټولو نوي لوبغاړي رشید شینواري ته هم چانس ورکړل شوی.

  • 16x9 Image

    جعفر هاند

    جعفر هاند په ۲۰۱۷ کې په واشنګټن ډي سي کې په امریکايي پوهنتون کې په نړیوالو مطبوعاتو او اړیکو کې ماستري کړې ده. لومړۍ ماستري یې په ۲۰۱۳ کال کې (له لېرې واټن- Distance Learning) د هند په اندرا ګاندي پوهنتون کې په سیاسي علومو کې کړې ده. د ننګرهار په پوهنتون کې یې قضا لوستې ده. له ۲۰۰۷ نه تر ۲۰۱۴ کاله پورې د بي بي سي د نړیوالې او افغان څانګې خبریال او پروډیوسر و. د ۲۰۱۴ کال له پیل راهیسې په واشنګټن کې د امریکا غږ اشنا راډیو/تلویزون خبریال دی. 

XS
SM
MD
LG