د کرکټ د نړیوالې شورا د شل اوریز نړیوال جام په دویم پړاو کې د دویم ګروپ دویمه لوبه د افغانستان او سکاتلنډ د لوبډلو تر منځ نن دوشنبه اکټوبر ۲۶ (لړم۳) د شارجې په لوبغالې کې کیږي.
افغانستان د کرکټ د نړیوالې شورا بشپړ غړی او سکاتلنډ د دویمې درجې یا اسوشیټ غړیتوب لري. لوبه د افغانستان په وخت د ماښام په ۷ بجو پیل کیږي.
دا د روان نړیوال جام په سیالیو کې د افغانستان لومړنۍ ګروپي لوبه ده.
د افغانستان سره په دې ګروپ کې د سکاټلنیډ تر څنګ هند، پاکستان، نیوزلینډ او نمیبیا لوبډلې شاملې دي.
افغانستان تر دې وړاندې هم د سکاتلنډ سره په نړیوال جام کې مخامخ شوی او د نړیوال جام یوازینۍ ګټل شوې لوبه یې هم د سکاتلنډ سره وه. افغانستان دا لوبه د ۲۰۱۵ کال د یو ورځنیو لوبو د نړیوال جام په سیالیو کې له سکاتلنډ څخه ګټلې وه.
د افغانستان د کرکټ د ملي ټیم کپتان محمد نبي تیره ورځ په متحده عربي اماراتو کې د کرکټ په شل اوریز نړیوال جام کی د سکاتلنډ خلاف د خپلې لومړۍ سیالۍ نه مخکې خبري کانفرانس ته وویل چې دوی ټولو سیالیو ته یو شان تیاری نیولی او د هر ټیم سره به د هغې د قوت په اندازه مقابله کوي.
افغانستان د سکاتلنډ سره شپږ د شلو شلو اورونو لوبې کړي او ټولې افغانستان ګټلي دي خو دا ځل سکاتلنډ د نړیوال جام په لومړني پړاو کې خپلې درې واړه لوبه وګټلې او تر ټولو ستر بری یې د بنګله دیش په خلاف و چې د کرکټ د نړیوالې شورا بشپړ غړیتوب لري.
د افغانستان د لوبډلې ډیره اتکا په دریو ورو توپ اچونکو (محمد نبي، راشد خان او مجیب الرحمان) ده. د سکاتلند لوبډلې هم منلې چې د نړۍ په کچه د افغانستان دا درې ورو توپ اچونکو یو ګواښ دی خو وایي چې لوبډلې پدې کار کړی چې ځنګه برعکس فشار پدې درې افغان لوبغاړو واچول شي.
د روانو شل اوریزو لوبو په لومړي پړاو کې سکاتلنډ درې واړه لوبې په عمان کې کړې او دا یې لومړی ځل دی چې د شارجې په لوبغالې کې لوبه کوي.