د افغانستان د حکومت اجرائیه ریاست پاکستان ترهګرو ته د پناه ځایونو په برابرولو تورنوي.
د ملي وحدت د حکومت د اجرائیه رئیس ویاند مجیب الرحمن رحيمي د پنجشنبې په ورځ [اپریل ۲۷] په کابل کې یوې مطبوعاتي غونډې ته د وینا پر مهال، افغانستان د ترهګرۍ "قرباني" وباله.
رحیمي چې د پاکستان د طالبانو د تحریک د پخواني ویاند، احسان الله احسان د پرونیو څرګندونو په اړه خبرې کولې پاکستان ته په خطاب کې وویل چې "له ترهګرۍ څخه د بهرني سیاست د ابزارو په توګه کار وانخېستل شي."
د پاکستان اردو د چهارشنبې په ورځ [اپریل ۲۶] د احسان الله یوه ویډیو خپره کړه. پدغه ویډیو کې چې احسان الله ځان "لیاقت علي" معرفي کوي وایې چې د افغانستان او هند استخباراتي ادارو د دوي له فعالیتونو څخه ملاتړ کاوه.
رحیمي وویل: "پاکستان د انزوا پر طرف روان دی او له ستونزو سره لاس او ګریوان دی. د عامه ذهنونو د منحرف کولو لپاره تبلیغات کوي. دا هیڅ سمه ادعا نه ده [د احسان الله خبرې] او موږ یې په کلکه ردوو."
د افغانستان او هند حکومتونه د پاکستان پوځ او په خاصه توګه ددغه هېواد د آی اېس آي اداره له ترهګرۍ څخه په ملاتړ تورنوي.
سربیره پردې، یو شمیر جګپوړو امریکايي او افغان مقاماتو له ترهګرۍ سره په مبارزې کې د پاکستان له دوه مخي چلند څخه اندېښنه ښودلې ده. دوي ویلي چې پاکستان وسله وال په "ښو او بدو ترهګرو" ویشلي دي.
"احسان الله" د پروپاګندا وسیله
د پاکستان د طالبانو تحریک هغه ادعاووې ردوي چې ګواکې د سیمې استخبارات لدغې ډلې سره همکاري کوي.
پاکستاني وسله وال د احسان الله د پرونیو څرګندونو په غبرګون کې ویلي چې آی اېس آی له یو نیول شوي طالب څخه په استفادې ددغې ډلې پر ضد تبلیغات کوي.
د پاکستاني طالبانو د تحریک یو ویاند محمد خراساني ویلي چې آی آېس آي له یو "زنداني" څخه د پروپاګندا لپاره استفاده کوي.
د نوبل جایزې پر ګټونکې، ملاله یوسفرۍ باندې د برید په شمول،احسان الله احسان د پاکستاني طالبانو په استازیتوب د ګڼو بریدونو د کولو ادعا کړې ده.