امنيتي چارواکي وايي، چې پر موسی خېلو والسوالۍ په حمله او جګړه کې د بهرنيو جنګياليو په ګډون سلګونو وسله والو برخه اخيستې وه. چارواکي زياتوي، جګړه سهار وختي پيل او تر غرمې يې دوام وکړ.
د خوست امنيه قوماندان مل پاسوال فيض الله غيرت امريکا غږ اشنا ته وويل، چې په جګړه کې ۱۰ طالبان وژل شوي او همدومره نور ټپيان دي. د هغه په وينا د طالبانو مړي او ټپيان د پېښې په ځای کې پاتې شوي دي.
قوماندان غيرت همدارنګه وويل، چې يو د ملي اردو سرتېری او يو پوليس هم وژل شوي او دغه راز نهه پوليس ټپيان دي. هغه د ټپيانو روغتيايي حالت ښه وباله.
هغه زياته کړه ” د موسی خېلو ولسوالۍ په دغه ستره تهاجمي حمله کې بهرني اتباع هم شامل وو، خو زموږ ملي اردو، ملي پوليسو او د ملي امنيت ځواکونو له ولسوالۍ څخه په کلکه سره دفاع وکړه‟.
پر مرستندوی ځواک برید
په عين وخت کې دغې جګړې ته د ورتلونکو مرستندويه امنيتي ځواکونو پر کاروان د سړک غاړې بمي چاودنه او وسله وال بريد شوی. چاودنه کې څلور ملکيان او په وسله وال بريد کې درې د ملي اردو سرتېري ټپيان دي.
موسی خېل د خوست شمال ته پرته غرنۍ ولسوالي ده، چې د طالبانو فعاليتونه پکې مخ پر زياتېدو ښکاري او حکومت يې هم پر ټولو سيمو واکمني نلري، خو امنيتي چارواکي په سيمه کې د پوځي عملياتو د ترسره کېدا خبر ورکوي.
قوماندان غيرت وويل ”موږ پلان لرو، چې نه يواځې په دغه سيمه، بلکې د خوست په نورو هغه سيمو کې چې امنيتي خطرونه پکې شته، عمليات وکړو او له طالبانو يې پاکې کړو‟.
له ډېرې مودې وروسته دا په خوست کې د ناامنۍ لومړنۍ ستره پېښه بلل کېږي. په دې وروستيو کې خوست د افغانستان يو له هغو ولايتونو ګڼل کېده، چې امنيتي وضعيت يې تر نورو هغو ښه بلل شوی.
طالبان وايي برید هغوی کړی دی.
