د فراه ولایت لسګونو اوسېدونکو د احمد شاه ابدالي په سر د تاج اېښودولو ۲۷۰ کال ولمانځه.
دغو خلکو د افغانستان ملي بېرغونه او د "احمد شاه بابا" تصویرونه له ځان سره لېږدول. راټولو شویو خلکو خوشحالۍ، اتڼ او ګډا وکړه.
دوی په پای کې یو پرېکړه لیک خپور کړ او له حکومت څخه یې وغوښتل چې د سرطان ۲۵ نېټه دې رسمي رخصتي اعلان کړي. د "افغانستان ولسي تحریک" دا مراسم تنظیم کړي وو.
د مراسم ګډونوالو له ولسمشر اشرف غني څخه هم وغوښتل چې د افغانستان یو شمېر علمي او تاریخي ځایونه او سیمې دې د احمد شاه ابدالي په نوم کړي.
احمدشاه ابدالي د معاصر افغانستان بنسټګر بلل کیږي چې په ۱۴۴۷ میلادي کال کې واک ته ورسید.
احمدشاه ابدالي تر خپلې مشرۍ لاندې د افغانستان د توکمونو د یوځاې کولو او د یوه ځواکمن شاهي نظام د رامنځته کولو سربیره، د خپلې واکمنۍ سیمې پراخې کړې.
احمدشاه ابدالي له ۲۵ کلنې واکمنۍ وروسته په ۱۷۷۲ کال کې مړ شو او د کندهار په ښار کې خارو ته وسپارل شو.
