په لوړ پوړيو پوځي ګمارنو کې د دولت وزیر امرالله صالح له دندې استعفا وکړه.
ښاغلي صالح خپله استعفا په خپل فیسبوک کې اعلان کړې ده. نوموړي هیله ښودلې ده چې د افغانستان دولت په دفاعي چارو کې ژور اصلاحات راولي.
هغه خپله استعفا د ولسمشر او اجرایي رئیس په نامه لیکلې ده. ده د خپلې استعفا علت نه دی ښودلی. خو ویلي یې دې چې وروسته به یې دلایل روښانه کړي.
ښاغلی صالح د افغانستان د ملي امنیت پخوانی مشر دی او د پاکستان ضد په څرګندونو باندې هم مشهور دی.
پر فیسبوک د هغه د استعفا له اعلان وروسته د هغه ګڼو پلویانو دا پرېکړه ستایلې ده، خو له نوموړي یې غوښتي چې د خپلې استعفا دلیل هم وښيي.
ولسمشر غني د ۲۰۱۷ کال د مارچ په ۱۷ ښاغلی صالح پر دغه نوي پوست وګماره.
امرالله صالح د زرغون بهیر په نامه ګوند مشر دی او د افغانستان د جمهوري ریاست په تېرو انتخاباتو کې د عبدالله عبدالله ملاتړی و.
