په نیپال کې چارواکي وایي لږ تر لږه ۶۷ کسان هغه مهال ووژل شول چې یوې نیپالۍ الوتکې چې ۷۲ کسان پکې سپاره وو، د یکشنبې په ورځ جنوري ۱۵ (مرغومي ۲۵) د پوخارا تفریحي ښار په یو نوي جوړ شوي هوایي ډګر کې د کښته کېدو په وخت کې په یوې درې کې سقوط وکړ.
د نیپان پوځي چارواکو فرانس پرس ته ویلي چې د ۲۹ کسانو جسدونه یې موندلي او ۳۳ نور د پیښې په ځای کې پاتې دي.
د ژغورنې عملې ویلي پېښه د نوي نړیوال هوایي ډګر څه ناڅه یونیم کیلومتره لرې وشوه. د الوتکې د غورځېدلو اصلي علت تر اوسه ندی معلوم شوی.
الوتکې د پلازمینې کتمندو نه پوخارا ښار ته پرواز کاوه چې له یو غر سره یې ټکر وکړ. چارواکو ویلي د پیښې اکثره قربانیان نیپالیان دي او پکې کې د الوتکې څلور عمله، او د پنځو هندي اتباعو، څلور روسانو او دوو کوریایانو په ګډون ۱۵ بهرنیان هم شامل دي.
په ټولنیزو رسنیو کې خپره شوې ویډیو ښيي چې پیښې په ځای کې د غورځېدلې الوتکې ټوټې شاوخوا پرتې دي، اور یې اخیستی او لوګي ورڅخه پورته کیږي.