د لاس رسي وړ اتصالات

هلمند کې پر ۲۱۵ میوند قول اردو وسله وال ډله ییز برید


افغان چارواکي‌ وايي تېره شپه شااوخوا دوې بجې یو شمیر وسله وال چې پوځي یونیفورم یې په تن و په هلمند کې پر ښوراب پوځي اډې چې د هلمند ۲۱۵ میوند قول اردو هم پکې موقعیت لری برید کړی دی.

د یاد برید په اړه تر دا مهاله بېلابېلا راپورونه ورکړل شوي دي.

د افغانستان دفاع وزارت نن جمعه برید تائید کړ او رسنیو ته په یوې لېږل شوې اعلامیه کې وویل چې ۱۲ تنو وسله والو د شپې دوې بجې پر ښوراب پوځي اډه یو پېچلی برید کړی دی.

دفاع وزارت وویل چې په دغه برید کې ۴ بریدګر وژل شوي خو زیاته کړې ده چې پاتې بریدګر د افغان سرتېرو لخوا محاصره شوي او جګړه لا هم دوام لري.

دفاع وزارت همدارنګه ویلي و چې جګړه کې تلفات اوښتي خو کره شمیر یې نه و ښودلی.

خو په سیمه کې یو شمېر امنیتي سرچینې بیا وايي چې په دغه برید کې د ګارنېزون د قومندان ډګرول معراج په ګډون ۱۹ افغان سرتېري وژل شوي‌ او څلور تنه نور ټپیان شوي دي.

دغه سرچینې بیا له امریکا غږ سره خبرو کې د حمله کوونکو شمیر ۷ تنه ښودلی او زیاته کړې وه چې د اوه واړو په وژلو سره برید پای ته رسېدلی دی.

پر همدې مهال د هلمند ولایت مطبوعاتي دفتر بیا د حمله کوونکو شمیر ۹ تنه ښودلی دی او زیاته کړې ده چې ټول افغان سرتېرو لخوا وژل شوي دي.

د هلمند مطبوعاتي دفتر په دغه برید کې د ۲۱۵ میوند قول اردو د ګارنېزیون د قوماندان ډګروال معراج د وژلو اوازې هم رد کړې.

خو د ورځې په وروستیو کې یوې بلې امنیتي‌ سرچینې بیا امریکا غږ ته وویل چې په هلمند کې پر ښوراب پوځي اډه او د ميوند پر قول اودو د وسله والو برید دوام لري او زیاته یې کړه چې وسله والو د پوځ بې وسلې سرتېري يرغمل کړي دي.

دغه سرچینه چې نه یې غوښتل نوم او غږ یې خپور شي وويل چې د وسله والو بريد کونکو شمېر تر رسمي اعلان شويو شمېرو زيات دی.

سرچينه زياته وي چي د ځانمرګو او وسله والو شمېر تر ۱۵ تنو هم اوړي.

افغان سرتېري
افغان سرتېري

سرچینه دغه راز وايي چې په بريد کې د ملي اوردو د وژل شويو سرتېرو شمېر هم تر ۲۵ تنو اوښتی او زيات تلفات په طعام خانه، د وسايطو د ترميم په ورکشاپ او نظام قره ول کې اوښتي چې د پوځ په يونيفورم سمبال وسله والو بريد کوونکو پرې ډزي کړي.

له بل پلوه وسله والو د ملي اوردو يو شمېر هغه سرتيري چې وسلې ورسره نه وې او د جمعې د ورځي رخصتي ته يې تياری نيوه هم وسله والو بريد کوونکو يرغمل کړي دي.

سرچینه وايي، باران او طوفاني هوا د تصفيې عمليات ستونزمن کړي، خو د کمانډو ځواکونه د ځمکې او هوا له لارې د پاتې وسله والو د ختمولو او د پوځ د يرغمل شويو سرتېرو د خلاصون هڅه کوي.

دا پر ښوراب پوځي اډه د وسله والو طالبانو دوهم ډله ییز برید دی، طالبانو‌ په ۱۳۹۳ کال کې پر دغه اډه ډله ییز برید کړی و.

د ۲۱۵ میوند قول اوردو قومنداني په ښوراب پوځي اډه کې ده چې د هلمند او نیمروز ولایتونو د امنیت مسئولیت په غاړه لري.

ښوراب د هلمند په شمال کې د واشېر ولسوالۍ په اړوند سیمه کې د کندهار – هرات پر لویه لار موقعیت لري.

افغان چارواکو ویلي چې کمانډو ځواکونه د برمته شوو سرتېرو د ژغرولو هڅې کوي.
افغان چارواکو ویلي چې کمانډو ځواکونه د برمته شوو سرتېرو د ژغرولو هڅې کوي.

بلي خواته وسله والو طالبانو هم رسنیو ته په یوه لیږل شوي بیان کې د یاد برید مسئولیت په غاړه اخیستی او زیاته کړې يې ده چې افغان او بهرنیو ځواکونو ته يې ګڼه مرګ ژوبله اړولې.

طالبانو ویلي چې د دوی کسان لا هم جګړه کوي.

وسله وال طالبان پر داسې مهال دغه برید کوي چې په دې وروستیو کې د سولې هڅې زیاتي شوي او په قطر کې د طالبانو او امریکايي استازو ترمنځ د سولې اړوند پنځم پړاو مذاکرات دوام لري.

  • 16x9 Image

    عزیزالله پوپل

    عزیزالله پوپل په جنوبي ولایتونو کې د امریکا غږ اشنا راډیو د پښتو خبریال دی. له امریکا غږ سره د کار له مخه یې په سیمه کې له ملي راډیو او ټلویزیون، روز خبري اژانس، هیواد ټلویزیون او افغان ازاد راډیو سره د خبریال په حیث کار کړی، او د کندهار په پوهنتون کې یې د ادبیاتو زده کړې ترسره کړې دي

XS
SM
MD
LG