برنډن مکولم پداسې حال کې توپ وهنی ته راښکته شو چې د لوبډلې د سر درې لوبغاړي یې سوځیدلي و او یوازې ۳۲ رنزونه یې کړي و. معمولاً د ټیسټ په لوبو کې لوبغاړي په ډیرو توپونو لږ رنزونه کوي خو برنډن مکولم چې د کرکټ په ټولو لوبو کې تیز رنزونه کوي، دا ځل یې د ټیسټ په لوبو کې ریکارډ جوړ کړ.
هغه په دوه پنځوس توپونو سلیزه وکړه او د هغو لوبغاړو د نومونو په جدول کې یې خپل نوم په لومړي قطار کې راوست چې د ټیسټ په لوبو کې یې په لږو توپونو سلیزې جوړې کړیدي.
د برنډن مکلولم نه وړاندې د ویسټانډیز د کرکټ مشهور لوبغاړی ویو ریچرډز په لږو توپونو سلیزه جوړه کړې وه. هغه په ۱۹۸۶ م کال کې د انګلستان د لوبډلې په خلاف په شپږ پنځوسو توپونو سلیزه جوړه کړې وه چې وروسته بیا د پاکستان د کرکټ د ټیسټ د لوبو کپتان مصباح الحق هم په ۲۰۱۴ م کال کې د اسټرالیا د لوبډلې په خلاف په شپږ پنځوسو توپونو سلیزه وکړه.
د برنډن مکولم دا نوی ریکارډ د هغه لپاره ځکه زیات اهمیت لري چې دا د هغه وروستۍ د ټیسټ لوبه ده. هغه لا وار د مخه د یو ورځنیو او شل اوریزو نړیوالو لوبو نه استعفا کړیده او اعلان یې کړی چې د اسټرالیا د لوبډلې سره د دې ټیسټ لوبې نه ورووسته به د ټیسټ د لوبو سره هم مخه ښه وکړي.
مکولم په ننۍ لوبې کې په ۷۹ توپونو ۱۴۵ رنزونه وکړل. شپږ شپږیزې او یوویشت څلوریزې یې ووهلې.