د هند د کرکټ د ملي لوبډلې یو تر ټولو چټک توپ اچوونکی جسپریت بومرا به په اسټرالیا کې د شلو شلو اورونو په نړیوال جام کې د دې هیواد په لوبډلې کې نه وي.
د هند کرکټ بورډ دوشنبه اکټوبر ۳ (تلې۱۱) ویلي چې د دې لوبغاړي ملا ژوبله ده.
په اعلامیې کې راغلي چې د دې هیواد د کرکټ بورډ طبي ډلې په لوبډلې کې د بومرا د نه ګډون پریکړه کړې او ویلي یې دي چې دا پریکړه یې د تفصیلي ارزیابیو او متخصصینو سره د سلا مشورو وروسته کړې.
تر اوسه نده معلومه چې هند به د را روان شل اوریز نړیوال جام لپاره د جسپریت بومرا پر ځای کوم لوبغاړی وټاکې او په اعلامیې کې یوازې دومره ویل شوي چې پدې هکله به پریکړه ډیر ژر وشي.
د ۲۰۲۲ کال د نړیوال جام سیالۍ د همدې روانې اکټوبر د میاشتې په ۱۵ مې په اسټرالیا کې پیلیږي.
اته ویشت کلن بومرا په هند کې تیره میاشت د اسټرالیا سره په لوبو کې برخه درلوده خو اوس مهال چې د جنوبي افریقا د لوبډلې سره د شلو شلو اورونو لړۍ روانه ده، دا تیز توپ اچوونکي پکې نشته.
هغه د لوبو د پیل څخه د ملا درد څخه شکایت کاوه.
د نړیوال جام کې د هند لومړنۍ لوبه د کټر سیال پاکستان سره د اکټوبر په ۲۳مه د ملبورن په ښار کې ده.
توپ وهونکو له پلوه غښتلې لوبډله ده خو څه وخت کیږي چې د شلو شلو اورونو د وروستیو اورونو لپاره د توقع سره سمو توپ اچوونکو د کمښت سره مخ ده.
هند په ۲۰۱۳ کال کې چې د اتلانو جام یې ګټلی، تر اوسه هیڅ کوم بل نړیوال یا داسې جام ندی ګټلی چې د دوو څخه ډیرې لوبډلې پکې برخه ولري.
هند تیره میاشت د آسیا جام د سیالیو په دویم پړاو یا سوپر فور کې نه یوازې د پاکستان بلکې د سریلانکا په لوبډلې هم لوبې وبایللې.
جسپریت بومرا د هند لپاره تر اوسه ۳۰ د ټیسټ، ۷۲ یو ورځنۍ نړیوالې لوبې او ۶۰ د شلو شلو شلو اورونو نړیوالې لوبې کړي.
د هند دا تیز توپ اچوونکی پښو سره جوخت (یارکر) توپ اچولو کې ماهر بلل کیږي او ځانګړې وړتیا یې د لوبو په ورستیو اورونو کې په دا ډول توپ اچولو کې ده خو پدې تیرو څو لوبو کې هغه ونشو کړی غوره توپ اچونه وکړي.