د افغانستان د جمهوري ریاست لومړی مرستیال جنرال عبدالرشید دوستم وایي چې هیڅ ډول تاوان ورته نه دی رسیدلی او د هغه د ټپي کیدو په هکله د اجرائیه رئیس عبدالله عبدالله څرگندونې یو سوء تفاهم و.
ښاغلي عبدالله سعودي عربستان ته له سفر دمخه د خبریالانو سره په خبرو کې خوښي څرگنده کړه چې د جنرال دوستم ټپ جدي نه دی او د هغه روغتیایي حالت ښه دی.
له دې دمخه هم یو شمیر رپوټونه خپاره شوي وو چې د ښاغلي دوستم کاروان ته د فاریاب په ولایت کې کمین نیول شوی و او د جمهوري ریاست په ماڼۍ کې حتی د دې پیښې په تائید سره د ښاغلي دوستم د پنځه ساتوونکو د وژل کیدو خبر هم ورکړی و.
خو جنرال دوستم د امریکا غږ آشنا تلویزیون سره په خبرو کې وویل چې اصلاً د هغه د موټرو کاروان د دښمن له کمین سره نه دی مخامخ شوی. ښاغلي دوستم وویل یو شمیر سرتیري د غورماچ د ولسوالۍ د نیولو په عملیاتو کې له کمین سره مخامخ شوي دي.
ښاغلي دوستم وویل چې تر اوسه په دغو عملیاتو کې وسله والو مخالفینو ته سخت تاوان رسیدلی دي او د هغه په وینا د هغه تر څارنې لاندې عملیاتو کې د مختلفو قواو ١٥ جنگیالي وژل شوي او ٢٠ تنه نور ټپیان شوي دي.
مخکني رپوټونه:
اجرائیه رئیس عبدالله عبدالله وایي د افغانستان د جمهوري ریاست لومړی مرستیال تیره ورځ د فاریاب په ولایت کې د وسله والو مخالفانو په یو برید کې سرسري ټپي شوی دی.
د افغانستان اجرائیه رئیس عبدالله چې سعودي عربستان ته د سفر وړاندې یې د وزیرانو د شورا په غونډه کې د خبریالانو پر وړاندې خبرې کولې وویل، چې د جنرال دوستم ټپونه ژور نه دي او روغتیایي وضعیت یې ښه دی.
ښاغلي عبدالله وویل " دا چې د افغانستان د جمهوري ریاست لومړی مرستیال د پیښې سره مخ شوی، خو له نیکه مرغه چې ټپونه یې ژور نه دي، چې پرې خوشاله یو، هغه ته او د وروستیو پیښو ټولو ټپیانو ته د عاجلې شفا غوښتنه کوم ".
د افغانستان جمهوري ریاست کې سرچینو هم امریکا غږ سره په خبرو کې پر جنرال دوستم باندې د فاریاب ولایت کې د وسله والو برید تائید کړی او ویلي دي چې په دغه برید کې د افغانستان د جمهوري ریاست د لومړي مرستیال پنځه ساتونکي وژل شوي دي، خو هغه ته کوم زیان نه دی رسیدلی .
په سیمه کې د امریکا غږ اشنا راډیو خبریال چې د افغان ځواکونو له خوا د غورماچ د ولسوالۍ د بیا نیولو د عملیاتو د بهیر د څارنې لپاره د یو شمیر افغان خبریالانو سره فاریاب ولایت ته تللی وایي، چې تیره ورځ جنرال دوستم د غورماچ ولسوالۍ د عملیاتو د څارنې لپاره دغې ولسوالۍ ته ورغلی وو.
د فاریاب د غورماچ د ولسوالۍ د بیرته نیولو عملیات د ۲۰۹ شاهین قول اردو قوماندان جنرال محمد کټوازی په غاړه لري او جنرال دوستم د دغو عملیاتو د څارنې لپاره فاریاب ته تللی دی.
په سیمه کې زمونږ خبریال میرویس بیژن وایي، چې نن هم وسله والو طالبانو د غورماچ ولسوالۍ د کنجک په سیمه کې د جنرال عبدالرشید دوستم د ځواکونو د قوماندان عبدالستار قاسمي په موټرو برید کړی چې ښاغلي قاسمي او ملګرو ته یې په برید کې زیان نه دی رسیدلی.
د فاریاب ولایتي چارواکي وایي جنرال دوستم لا هم په سیمه کې د طالبانو پر وړاندې د روانو عملیاتو څارنه کوي.
دا سرچینې وایي، جنرال دوستم به د غورماچ د ولسوالۍ د نیولو او له قیصار څخه د طالب وسله والو د ایستلو تروخته په فاریاب ولایت کې پاتې شي او روان عملیات به وڅاري.
طالبانو تیره ورځ د غورماچ ولسوالۍ د جګړو په اړه یو ویډیو هم خپره کړې چې په کې د ولسوالۍ مرکز د دغې ډلې د وسله والو په لاس کې لیدل کیږي. د طالبانو دغه ویاند ویلي چې د غورماچ ولسوالۍ په جګړو کې یې د میرویس په نوم د جنرال دوستم یو قوماندان او د هغه ګڼ شمیر وسله وال وژلي دي.
خو طالبانو د جنرال دوستم د ټپي کیدو په اړه رسنیو ته څه نه دي ویلي.
خو ددغې ډلې یو ویاند قاري محمد یو سف احمدي د خپل ټويټر په پاڼه لیکلي چې طالب وسله وال نه یوازې دا چې د غورماچ ولسوالۍ او امنیه قوماندانۍ ودانۍ په لاس کې لري ، نن یې د فاریاب ولایت د شیرین تګاب د ولسوالۍ پر دولتي تاسیساتو باندې بریدونه کړي دي. همداشان طالبانو ویلي چې د فاریاب ولایت د مرکزد میمنې ښار پر امنیتي پوستو اود قیصار ولسوالۍ غوري سیمه کې د افغان امنیتي ځواکونو پرپوستو بریدونه کړي، چې د قاري احمدي پر وینا په دغو بریدونو کې یې افغان ځواوکونو ته درانه تلفات اړولي دي.
په فاریاب ولایت کې تازه جګړې درې ورځې وړاندې پیل شوي دي.