د نړۍ د ۵۰ هیوادونو نه چارواکي نن د یکشنبې په ورځ د شیکاګو په ښار کې د ناټو د دوه ورځنۍ سرمشریزې غونډې دپاره راغونډ شوي دي او ددغه تړون پر راتلونکو موضوګانو باندي بحث کوي. ویل کېږي چې ولسمشر اوباما نن د غونډې په پیل کې لومړی د افغانستان د ولسمشر حامد کرزي سره وګوري.
ویل کېږي چې په دې غونډه کې د افغانستان موضوع د اجنډا په سر کې ده. ددې غونډې کوربه توب د امریکا ولسمشر بارک اوباما کوي. ولسمشر اوباما د دې وړاندي د میرلیند په ایالت کې په کمپ ډیویډ کې د نړۍ د اتو بډایو هیوادونو د غونډې کوربه توب هم وکړ. په هغې غونډه کې هم د عرب پاڅون، د سوریې مسله، په نړۍ کې د انرژۍ او خوراکي موادو د امنیت د مسلو تر څنګ د افغانستان مسله مطرح شوه. ټاکل شوې وه چې هغه غونډه هم په شیکاګو کې پرانیستل شي خو وروسته یې موقیعت د مریلنډ ایالت ته بدل شو.
ناټو په پام کې لري چې په تدریجي ډول د افغانستان د مسولیت چارې د ۲۰۱۴ کال تر پایه پوري و افغان ملي امنیتي ځواکونو ته وروسپاري او د ۱۳۰ زرو بهرنیو ځواکونو دپاره د وتلو لاره هواره کړي.
د ناټو په دې دوه ورځنۍ غونډه کې به پر هغو ۴ میلیاردو ډالرو باندي هم خبري وکړي چې د افغانستان د ملي امنیتي ځواکونو د روزلو او تمویل دپاره ورته اړتیا ده.
خو د ناټو د غړو ترمنځ چې ځيني یې د مالي ستونزو سره مخامخ دي د افغانستان د ماموریت نه د ملاتړ په هکله اندېښنې موجود دي. د فرانسې ولسمشر فرانسوا هولانډې یو ځل بیا خپل پر پلان باندي تاکید وکړ چې د روان کال تر پایه پوري به د افغانستان څخه فرانسوي ځواکونو وباسي او پرځای به یې د افغانستان سره د نورو لارو نه مرسته وکړي.
د ناټو عمومي منشي اندراس فاګ راسموسن وویل چې پاکستان په دې پلانونو کې مهم رول لري او په همدغه دلیل یې د پاکستان ولسمشر آصف علي زرداري دغې غونډې ته راوبلی. پاکستان روانه اونۍ پر دې هوکړه وکړه چې د ناټو د اکمالاتي کاروانو پر وړاندې به د تورخم لاره بیرته پرانیزي. اسلام آباد دغه لاره پروسږ کال وروسته له هغه نه وتړله چې د امریکا په مشري په هوايي بمبارۍ کې یې ۲۴ عسکر ووژل شول.
د یادونې وړ ده چې په شیکاګو کې د ناټو د دوه ورځنی سرمشریزې غونډې دپاره ټینګ ترتیبات نیول شوي دي او تمه کېږي چې په زرګونو مظاهره کونکي به په ښار کې لاریون وکړي.