د لاس رسي وړ اتصالات

هره میاشت افغانستان کې نیږدې سل تنه د ماینونو قرباني کیږي


افغانستان کې د اوږدې جکړې له امله اوس هم په ۶۰۰ کیلومټره مربع ځمکه کې ماینونه لا پاک شوي ندي.
افغانستان کې د اوږدې جکړې له امله اوس هم په ۶۰۰ کیلومټره مربع ځمکه کې ماینونه لا پاک شوي ندي.

له ماینونو نه د متاثرو افغانانو مؤسسه وايي، چې هره په میاشت په منځنۍ کچه په افغانستان کې د ماینونو د چاودنې له امله نېږدې سل تنه قرباني کیږي او په افغانستان کې د ماینونو د قربانیانو شمیر په وروستیو کلونو کې زیات شوی دی.

د السو په نوم ددې مؤسسې مشر اسلام محمدي په کابل کې د ماینونو د قربانیانو د سروې د اعلان په مهال وویل چې په ۲۰۱۶ کال کې د ماینونو د قربانیانو شمېر د ۲۰۱۵ کال په پرتله خورا زیات دی او تېر کال په افغانستان کې ۱۹۴۳ تنه د ماینونو قرباني شوي دي.

ښاغلي محمدي وویل "متاسفانه په افغانستان کې د وړم کال پرتله تېر کال د ماینونو د قربانیانو شمېر ۶۳۳ زیات شوی دی. تېر کال ۱۹۴۳ تنه د ماینونو د چاودنو قرباني شوي وو. اوړم کال بیا ۱۳۱۰ تنه د ماینونو قرباني شوي".

هغه وویل پنځه کاله پرلپسې افغانستان د ماینونو د قربانیانو لوړه شمېره درلوده خو تېر کال یمن تر افغانستان مخکې شوی او افغانستان دوهم ځای د ماینونو د قربانیانو له اړخه لري.

محمدي وویل د افغانستان سویلي ولایتونه تر نورو زیات د ماینونو قرباني ورکوي. لوی لامل یې د سړک د غاړې ماینونه او مقناطسي بمونه یادوي.

له جینوا د ۲۰۱۷ کال د ماینونو د څار راپور ښيي، چې په ۲۰۱۶ کال کې اته زره او شپږ سوه تنه د ماینونو ښکار شوي چې ۴۲ په سلو کې پکې ماشومان یاد شوي دي.

د ماین پاکوونې د مؤسساتو په ويناء اتیا په سلو کې د پخواني شوروي اتحاد د یرغل د مهال ماینونه پاک شوي خو تر ټولو لویه ستونزه د نویو ماینونو ده.

دم ګړۍ په افغانستان کې په ۶۰۰ کیلومټره مربع ځمکه کې ماینونه شته چې لا پاک شوي ندي.

افغانستان راتلوونکې اوونۍ د ماین د منعې د نړیوال میثاق ریاست په غاړه اخلي او د ۲۰۱۸ کال له پيله به په جینوا کې د ماین پاکۍ د ټولو جلسو ریاست کوي. د السو د مؤسسې په ويناء دا ښه وخت دی چې افغانستان له دې موقعې ګټه پورته کړي.

د شمېرنو له مخې د ۲۰۱۶ کال په اوږدو کې د ماين پاکوونې مؤسسو له نړیوالې ټولې څه باندې ۵۵ ملیونه امریکايي ډالره مرستې ترلاسه کړي. د السو مؤسسه وايي، دا مرستې لا هم سمې ندې معلومې چې چېرې لګول شوي دي.

په افغانستان کې د معلولیت لرونکو یوه شمېره ښيي، چې تر اته سوه زره پورې معلولین شته چې ډېري یې د جګړو او ماینونو له امله دي.

د ماینونو نه د خالي افغانستان پلان په ۲۰۱۳ کال جوړ شوی وو او په پام کې ده چې تر ۲۰۲۳ کال پورې افغانستان له ماینونو خالي شي.

XS
SM
MD
LG