د هندي رسنیو د راپور په اساس د دغه هېواد مشهور فلمي ستوری درمندرا دیول د دوشنبې په ورځ د ۸۹ کاله په عمر د ممبۍ په ښار کې مړ شو.
نوموړی له څو اونیو راهېسې رنځور و او څه موده مخکې یې د مړینې ناسم خبرونه هم خپاره شوي وو.
تر دې دمه د درمندرا کورنۍ د هغه د مړینې خبر نه دی تائید کړی، خو هندي رسنیو او د بالیووډ مشهورو ستورو د هغه د مړینې له کبله د تسلیت پیغامونه خپاره کړي دي.
د هند صدراعظم نریندرا مودي په خپل ایکس حساب کې د هغه د مړینې له کبله د غمرازۍ پيغام خپور کړی او د هغه کورنۍ او مینه والو سره یې خواخوږي څرګنده کړې ده. نوموړي د درمندار مړینه د «هند سینما د یو عصر اختتام» بللې. مودي لیکلي دي: «هغه د سینما یو فوق العاده شخصیت او لوبغاړی و او هر رول یې چې لوبوه، هغه رول ته یې جذابیت بخښه.»
درمندار د بالیووډ په سینما کې تقریبآ شپږ لسیزې کار وکړ او په شاوخوا ۳۰۰ فلمونو کې یې رول ولوبوه. هغه له ۲۰۰۴ کال څخه نیولې تر ۲۰۰۹ کال پورې د هند د پارلمان غړی هم و.
هغه دوه ودونه کړي وو او شپږ اولادونه یې لرل، چې سني دیول، بابي دیول او ایشا دیول یې هم په فلمونو کې کار کوي.
فورم \ دبحث خونه