د جمعې په ورځ د ترکیې په الازیګ ولایت کې د ریښتر په کچه د ۶.۸ درجې زلزلې له امله ۱۸ تنه مړه شوي او ۵۰۰ نور ټپیان شوي دي.
د ترکیې بېړنیو پېښو سره د مبارزې ریاست د یاد خبر په تائید سره ویلي چې ۳۰ تنه نور تر نړېدلو ودانیو لاندې بند پاتې دي.
سلګونه کورنۍ چې د زلزلې له امله یې کورونه نړېدلي د محصلینو لیلو او سپورټي مرکزونو ته یې پناه وړې ده.
د ترکیې د چاپېریال ساتنې وزیر ویلی، چې په دوو ولایتونو کې د زلزلې د سختو ټاکنونو له امله ۳۰ کورونه کېنستلي دي.
د ترکیې ولسمشر رجب طیب اردوغان پر خپل ټوېټر لیکلي:"ځانګړي اقدامات نیول شوي دي، تر څو دا ډاډ تر لاسه شي، چې په دغو ولایتونو کې له یادې زلزلې څخه رامنځته شوي تلفات او زیانونه کم شي."
ترکیه د خپل جغرافیوي موقعیت له امله اکثره وخت د زلزلې د سختو ټکانونو شاهده وي، په ۱۹۹۹ کال کې دوو قوي زلزلو د ترکیې په شمال لوېدیځ کې ۱۸زره تنه مړه کړل.
په ۲۰۱۰ میلادي کال بیا د ترکیې د پایتخت انقرې په ۷۵۰ کیلومترۍ پروت الازیګ ولایت کې زلزلې ۵۱ تنه مړه کړل.