د خوست ولایت چارواکي وایي چې د نادرشاه کوټ په ولسوالۍ کې د فوټبال په میدان کې یوې چاودنې لږ تر لږه درې کسان وژلي او شاوخوا لس نور یې ژوبل کړي دي.
چاودنه د دوشنبې په ورځ (مارچ۲) په ځايي وخت مازدیګر شوې ده. یو چارواکي امریکا غږ ته وویل چې ماین په یو موټر سایکل کې اېښودل شوی و او وژل شوي ټول ولسي خلک دي چې د لوبې لیدو ته راټول وو.
د خوست د عامې روغتیا مشر حبیب شاه انصاري وایي چې روغتون ته ۱۱ ټپیان انتقال شوي دي. د زخمیانو عمرونه د ۱۵ او ۳۰ ترمنځ ښودل شوي دي.
د خوست والي حلیم فدايي په خپل ټویټر کې هم دا خبر خپور کړی دی.
تر دې دمه د دغه برید مسولیت چا نه دی اخیستی. دا برید داسې مهال کيږي چې دوه ورځې مخکې په افغانستان کې د تاوتریخوالي د کمولو اونۍ ختمه شوه او طالبانو له امریکا سره (افغانستان کې د سولې راوستلو تړون) لاسلیک کړ.
دا تړون له افغانستان څخه د بهرنیو ځواکونو وتلو او بین الافغاني مذاکراتو ته لار پرانیزي.
