د افغانستان جمهوررئیس محمد اشرف غني وايي، پاکستان ته یې د هغو تروریستانو د نومونو بشپړ لیست چې په افغانستان کې په تروریستي فعالیتونو کې لاس لري سپارلی او اوس د دغه هیواد څخه د هغوی پر وړاندې د اقداماتو په تمه دی.
د افغانستان جمهور رئیس محمد اشرف غني نن د جمعې د لمانځه د ادا کولو وروسته افغان ولس ته په خپله وینا کې چې دارګ د جومات څخه د افغانستان د ملي راډیو تلویزیون له لارې په ژوندۍ بڼه خپریدله له پاکستان وغوښتل چې د خبرو پرځای دې عمل وکړي.
جمهور رئیس غني وویل" د طالبانو مرکز پاکستان کې دی، اوس د پاکستان حکومت ته د تصمیم وخت راغلی، چې هغه شی، چې د ځان لپاره مني، ټول جهان د اسلام لپاره یې مني او یا د دوی تصور دادی، چې تنها د دوی علما پوهیږي او نور علما په څه نه پوهیږي".
جمهور رئیس غني وویل، چې پاکستان ته یې د هغو افرادو او د هغوی د شبکو د نومونو یو منظم لیست سپارلی، چې په افغانستان کې په تروریستي فعالیتونو کې لاس لري.
جمهور رئیس وویل " مونږ اقدام ته په تمه یو، هره پروسه دا خبرې، د کاغذ پر مخ خبرې دي، د افغانستان ملت د عمل، څرګند او پرکنده عمل غوښتنه کوي".
جمهور رئیس محمد اشرف غني د دغې وینا پرمهال د هغه شاوخوا ته زیات شمیر هغه لمونځ کوونکي هم راټول شوي وو، چې له هغه سره یې په ارګ کې د جمعې لمونځ ادا کړی وو.
د هغوی په ډله کې د پخوانیو مجاهدینو د ډلو یو شمیر پخواني لوړپوړې چارواکي، د سولې د عالي شورا یو شمیر غړي او د پارلمان استازي هم شامل وو.
جمهور رئیس محمد اشرف غني په خپله یوولس دقیقې وینا کې پر طالبانو هم غږ وکړ چې د هغو سره خپل صف جلا کړي، چې د جمهور رئیس غني پر وینا د باطل خوا یې نیوله ده.
جمهور رئیس غني وویل، سوله په ابهام کې ده، خو زیاته یې کړه چې افغانان به هم سوله او هم جګړه وګټي.
د پاکستان د بهرنیو چارو وزارت ویاند محمد فیصل د جمهور رئیس غني څرګندونو ته په غبرګون کې ویلي، چې دا سمه نه ده چې په افغانستان کې د روانې ناامنۍ ټول مسولیت په پاکستان واچول شي.
ښاغلي فیصل د افغانستان د بیا رغونې لپاره د سرمفتش د دفتر هغه راپور ته اشاره وکړه، چې په کې د دغه هیواد په شاوخوا ۴۰ فیصده خاوره کې د وسله والو طالبانو د فعالیتونو په اړه څرګندونې شوي دي.
همداشان محمد فیصل، په پاکستان کې د حقاني د شبکې او طالبانو د مشرانو شتون په کلکه رد کړ.
هغه وویل، چې افغان حکومت ورسره معلومات شریک کړي، چې پاکستان به ژر افغان حکومت خپل ځواب وسپاري.