په فراه ولایت کې د افغان پوځ یوې هلیکوپټرې سقوط کړی، چې په کې د دولت د یو شمیر ملکي او پوځي چارواکو په ګډون ۲۵ تنه وژل شوي دي.
ارګ دا یوه غمیزه بللې او د پېښې په اړه یې خواشینې ښودلې ده.
د ارګ په اعلامیې کې ویل شوي دي چې په پېښه کې "د ۲۰۷ ظفر قول اردو مرستیال بریدجنرال نعمت الله خلیل، د فراه ولایتي شورا رئیس فرید بختور، د دې شورا دغړې جمیلې امیني او د پیلوټ ډګروال محمد عارف په ګډون د فراه یو شمېر نور ملکي او نظامي مسئولین چې په دې پېښه کې شهیدان شوي د دې وطن رېښتینې بچیان وو."
د فراه د والي ویاند ناصر مهري امریکا غږ ته وویل چي پېښه د چهارشنبې په سهار د (لړم/عقرب ۹) د فراه د ناردرې او د هرات د شینډنډ ولسوالۍ ترمنځ سیمه کې رامنځ ته شوې ده.
د ظفر ۲۰۷ قول اردو هم دغه پیښه تائید کړې او ویلي یې دي، چې دغې هلیکوپټرې له فراه څخه هرات ولایت ته د بیرته تګ پر مهال سقوط کړی دی.
د افغان چارواکو پر وینا دغې هلیکوپټرې له غره سره د جنګیدو له امله سقوط کړی دی.
خو وسلهوالو طالبانو ادعا کړې، چې د دغې ډلې جنګیالیو د افغان پوځ هلیکوپټرې ته سقوط ورکړی دی.