په لندن کې د پرونۍ چاودنې نه وروسته چې ۲۹ کسان پکې ټپي شول، چارواکو د خطر کچه د شدید حالات نه حساس ته پورته کړیده. د اسلامي دولت یا داعش ډلې ادعا کړې چې برید هغوي کړی.
د برتانیې صدراعظمې تریزا مې اعلان وکړ چې د تروریزم د څیړنې ګډ مرکز پریکړه کړې چې د خطر کچه تر "حساس" حالته پورته کړي. د ښاغلې مې په وینا د دې نه معلومیږي چې بل برید هم ښایي کیدونکی وي.
د برتانیې صدراعظمې ویلي دي چې پوځ به د ځینو سیمو د امنیت په ساتلو کې د پولیسو سره مرسته کوي. هغې همدارنګه وویل چې په راتلونکو څو ورځو کې به د ښار په لارو کوڅو او د ترانسپورت په شبکو کې زیاته اندازه په وسلو سمبال پولیس ولیدل شي.
مخکني معلومات:
د لندن پولیس وایي په کور کې د جوړ شوي بم په یوه چاودنه کې چې د لندن د مترو اورگانډي په یو تم ځای کې وشوه ٢٢ کسان ټپیان شوي دي.
د جمعې د ورځې دغه پیښه په بریتانیا کې په روان میلادي کال کې شپږمه تروریستي پیښه گڼل شوی ده.
دغه چاودنه د لندن د مترو په "پرسنز ګرین" تمځای کې د سهار په شاوخوا اته بجو او شل دقیقو شوې ده.
په اورگاډي کې سپاره مسافر مله چې چاودیدونکو موادو اور واخیست له اورگاډي نه په تیښته شول چې د پولیسو او عیني شاهدانو په وینا یو شمیر مسافر په ټیل ماټیل او گڼه گوڼه کې ټپي شوي دي.
د بریتانیا د ترهگرۍ ضد یو لوړپوړي چارواکي مارک رولي خبریالانو ته وویل چې دا چاودنه په لاس د یو جوړ شوي چاودیدونکي الې له وجې رامنځ ته شوې ده.
د لندن ښاروال صدیق خان، ویلي چې د بریتانیا پایتخت به د ترهگرۍ پر وړاندې "هیڅکله" ناکام نه شي.
ټاکل شوې چې د بریتانیا صدراعظمه تریزا می، د لندن د پیښې په اړه د یوې بېړنۍ غونډې مشري وکړي.
د امریکا د متحده ایالاتو جمهور رئیس دونالد ټرمپ د ټویټر په یو پیغام کې د لندن دغه پیښه یو تروریستي عمل بللی دی. ښاغلي ټرمپ په یو ځانگړي ټوټري پیغام کې د "ترهگرو په وړاندې د جدي اقداماتو" غوښتنه کړې ده او ویلي یې دي چې انټرنیټ د ترهگرو ډلو لپاره د جلب او جذب ډیره ښه وسیله ده چې باید دا کار وڅیړل شي.
په ٢٠٠٥ کال کې د لندن د ځمکې لاندې مترو په دریو اورگاډیو کې ځانمرگي بریدونه شوي وو چې ٥٢ کسان په کې ووژل شول. دغه بریدونه څلورو بریتانوي اسلامپالو کړي وو.