د افغانستان د خپلواکۍ ۱۰۷مه کلیزه په ټولنیزو رسنیو کې

د ټولنیزو رسنیو کاروونکو د افغانستان د خپلواکۍ د ۱۰۷مې کلیزې په اړه بیلابیل نظرونه خپاره کړي دي.

د افغانستان ډیرو سیاستوالو او نورو مخورو څېرو ددغې ورځې په مناسبت افغانانو ته مبارکي ویلې ده. یو شمېر د ټولنیزو رسینو کاروونکو د طالبانو د حکومت د هغې غونډې تصویرونه خپاره کړي دي چې د خپلواکۍ د ورځې په مناسبت جوړه شوې وه. خو ډیرو نورو کاروونکو بیا نیوکه کړې ده چې د طالبانو د بیاواکمن کېدو راهیسې په افغانستان کې د خپلواکۍ د ورځې نمانځنې کم رنګه شوي دي.

د افغانستان د کرکټ مشهور لوبغاړي راشد خان ددې ورځې مبارکي ویلې ده.

راشد خان لیکلي: «هر وطندار مې دې سرلوړی، بریالی او سوکاله وي.» د هغه د فیسبوک پر دغه پوسټ باندې په څو ساعتونو کې له ۸۰۰۰ زیاتو کاروونکو تبصره کړې ده.

د ارګ پخواني ویاند شاه حسین مرتضوي لیکلي چې «د افغانستان د خپلواکۍ د ترلاسه کولو ۱۰۷ کاله پس، تر بل هر وخت زیات دې ته اړتیا لرو چې د هېواد نوی نسل د ښوونځیو، تعلیمي مرکزونو، رسنیو او د تاریخ د مطالعې له لارې د شاه امان الله خان له هیلو، ارمانونو او پروګرامونو سره لا ډېر اشنا شي.»

په ملګرو ملتونو کې د افغانستان استازي نصیر احمد فایق لیکلي چې خپلواکي یوازې له بهرني تسلط څخه خلاصون نه دی؛ رښتینې خپلواکي هغه وخت تحقق مومي چې د خلکو ارادې ته درناوی وشي، انساني کرامت یې خوندي وي، او هېڅ هېوادوال د جنسیت، قومیت، ژبې، مذهب یا سیاسي نظر له امله له خپلو اساسي حقونو څخه محروم نه شي.

د افغانستان د سیمه ایزو مطالعاتو پخواني مشر غفور لیوال لیکلي چې د افغانستان د ریښتینې خپلواکۍ ١٠٧م جشن دې ټولو افغانانو ته بختور شي.

لیوال لیکلي چې دا خپلواکي ځکه ریښتینې وه چې، «افغانستان د یوه خپلواک هېواد په توګه ټولې نړۍ په رسمیت وپېژاند. د خپلواکۍ له برکته لومړنی اساسي قانون جوړ شو او د هر افغان انسان بشري حق په کې تضمین شو. افغانه ښځه "انسان" وګڼل شوه او د زدکړې او کار حق یې وموند.»

د افغانستان د ټاکنو د کمیسیون پخواني مشر ضیاالحق امرخیل په خپل یو پوسټ کې لیکلي چې د داسې افغانستان هیله لري چې «ټول افغانان، په ځانګړې توګه نجونې، د زده‌کړې او لوړو زده‌کړو له خپل اساسي حق څخه په بشپړه توګه برخمنې شي.»

افغانې خبریالې مینه اکبري هم په خپل پوسټ کې همدا هیله څرګنده کړې ده. هغې لیکلي د داسې افغانستان هیله لري چې پکې سوله، ازادي، عدالت، تعلیم او د هر افغان د عزت او کرامت حق خوندي وي.

پاکستاني ژورنالست حسن خان هم ددغې ورځې په مناسبت ټولو افغانانو ته مبارکي ویلې. هغه په دې پیغام کې لیکلي چې د داسې یو سوله‌ییز، اباد، پرمختللي او سیال افغانستان هیله لري؛ چې له پاکستان سره یې ښې، پراخې او مخ پر ودې تجارتي، سیاسي او اقتصادي اړیکې لا پیاوړې شي.

د کابل پوهنتون یو استاد فیض محمد ځلاند په خپل پوسټ کې پاچا امان الله خان ته منسوبه هغه خبره خپره کړې چې وايي «یو بیسواده هېواد هیڅکله د خپلواکۍ وړ نه ګرځي، که غواړئ چې ریښتینې ازادي ترلاسه کړئ، قلم او کتاب در واخلئ.»

د اې بي این په نوم پښتو پاڼې د افغانستان د ۱۰۱مې کلیزې د مراسمو یوه پخوانۍ ویډیو خپره کړې ده چې پکې پخوانی ولسمشر اشرف غني ښکاري چې د استقلال پر څلي د ګلانو ګېډۍ ږدي.

دغې پاڼې لیکلي: «په جمهوري نظام کې د غازي امان الله خان په مشرۍ د هیواد ترلاسه شوې خپلواکۍ ورځ په ډېر ویاړ نمانځل کېدله خو په وروستیو کلونو کې طالبان دغه ورځ یوازې تر خپلې ډلې محدوده نمانځي او حتی په مراسمو کې د غازي امان الله خان یادونه نه کوي او نه په کې د پخوا په څېر د افغانانو پراخه ګډون لیدل کېږي.»

نوریال کلیوال د امان الله خان او مېرمنې تصویر خپور کړی او ورسره یې لیکلي چې د هغې ورځې په هیله چې «له هېواده سختدريځي، تاريکي او جهالت یو ځل بیا کډه وکړي او پر ځای يې روښانفکره، مترقي او ملتپاله اماني نظریه پښې ټینګې کړي.»

XS
SM
MD
LG