د سولې او برابرۍ په چارو کې د ډهلي اسامبلۍ د هند لپاره د فیسبوک مسؤل مدیر اجیت موهن احضار کړی چې د یو شمیر تورونو په هکله سپیناوی وکړي.
په فیسبوک دا تور دی چې په نړۍ کې خپل ستر مارکیټ نه د خطرناکو موادو په لیرې کولو کې ناکام شوی.
د وال سټریټ ژورنال ورځپاڼې د اګست په میاشت کې په راپور کې ویلي وو چې فیسبوک پدې نه توانیدلی چې د مسلمانانو په هکله د بهارتیا جانتا د ګوند د یو غړي د کرکې نه ډکه تبصره لیرې کړي. په راپور کې ویل شوي چې فیسبوک دا کار د خپلو ګټو د خوندي ساتلو په خاطر کړی.
د وال سټریټ ژورنال د راپور د خپریدو نه وروسته په هند کې په فیسبوک انتقادونه زیات شول او د ټکنالوژۍ دغه ستر شرکت مجبور شو چې د بهارتیا جانتا د ګوند د غړي ټي راجا سنګ حساب وتړي. هغه په فیسبوک کې لیکلي وو: " برما نه راغلي روهینګیایي مسلمانان باید وویشتل شي."
ښاغلي سنګ ویلي چې په فیسبوک کې خپل حساب د تړل کیدو پوښتنه به کوي او دا کار یې د بهارتا جانتا په ګروپ برید بللی.
په هند کې څلورو مشهورو ژورنالستانو او د ټولنیزو شبکو د حقونو فعالینو د ډهلې کمیټې ته د فیسبوک په هکله شکایت کړی و. هغوي د دې کمیټې نه غوښتي و چې په فیسبوک کې د "خطرناکو موادو" په هکله څیړنې وکړي.
دې کمیټې د هند لپاره د فیسبوک د مدیر اجیت موهان نه غوښتي چې د همدې روانې میاشتې په پنځلسمې نیټې حاضر شي او د دغو تورونو په هکله دې ځواب ووایي.
د دې نه وړاندې په امریکا کې د مدني حقونو د فعالینو یوې ډلې هم ادعا کړې وه چې فیسبوک په هند کې د کرکې نه د ډکو معلوماتو په لیرې کولو کې پاتې راغلی او په هند کې د فیسبوک د پالیسۍ د مشر آنکي داس د لیرې کولو غوښتنه یې کوله.
خو د فیسبوک شرکت دا نه مني چې هغوي سیاسي تمایل لري خو دا یې منلې چې د کرکې نه ډکې ویناوې به کنټرولوي.
په هند کې د پارلمان یو بل غړي بیا ویلي چې د فیسبوک نه باید د فبروري په میاشت کې په نوي ډهلي کې په فرقوي شخړو کې د نقش درلودلو یا لاس لرلو په هکله تحقیقات وشي. پدې ناکرراریو کې تقریباً ۵۰ کسان ووژل شول چې اکثریت یې مسلمانان و.