د ملګرو ملتونو غړو نن پنچشنبه نومبر لسمه (عقرب۱۹) له هند څخه وغوښتل چې د جنسیت په اساس خشونت او د دیني تبعیض په ضد اقدامات وکړي.
ملګري ملتونه د نړۍ هېوادونه د بشري حقونو سابقې ته په کتو درجه بندي کوي.
د نوي ډهلي استازي په ملګرو ملتونو کې په دې اړه د انتقاد کوونکو نظریات واورېدل او په دې برخه کې یې د بشر د حقونو د مدافعانو رول وستایه.
په همدغې غونډې کې له هند څخه وغوښتل شول چې د شکنجې ضد کنوانسیون هم تصویب کړي، هند دا کنوانسیون لاسلیک کړی خو تصویب کړی یې نه دی.
دا په داسې حال کې ده چې په هند کې د جنسي تېریو او دیني تبعیض د پېښو له کبله د دغه هېواد په حکومت باندې کلک انتقادونه کېږي.
په ملګرو ملتونو کې د هند استازي تشار مهتا په خپلو خبرو کې هر ډول شکنجه وغندله او ټېنګار یې وکړ چې نوی ډهلی د جنسیتي خشونت، شکنجې او په خپل سر د خلکو د زنداني کولو په خلاف قوي موقف لري.
د ملګرو ملتونو د بشري حقونو په شورا کې د امریکا استازي مایکل تیلور وویل چې هند باید د «غیر قانوني فعالیتونو د مخنیوي قانون» په لویه کچه تطبیق کړي او د بشري حقونو د فعالانو، خبریالانو او دیني اقلیتونو په ضد دې د ورته قوانینو پلي کول هم کم کړي.
نوموړي وویل چې په هند کې د ترهګرۍ ضد قانون له کبله له ډېر وخت څخه د بشري حقونو یو شمېر مدافعان زندانونو کې اچول کېږي. ښاغلي تیلور وویل چې په هند کې د جنسیت په اساس خشونت او دیني تبعیض تل موجود و.
کاناډا هم له هند څخه وغوښتل چې په دې برخه کې لاس په کار شي او د تحقیقاتو او پلټنو له لارې دې یې د دغه کار مخه ونیسي.
نیپال، بریتانیا، چین، بوتان، جرمني، استرالیا، سعودي عربستان او سویس هم له هند څخه وغوښتل چې د انساني قاچاقو، اجباري کارونو، جنسیتي نابرابرۍ، په ښځو او نجونو باندې د جنسي تېریو او د منزوي شویو ډلو ټپلو د حقونو د نقض کولو د مخنیوي لپاره اقدامات وکړي.
د هند د بهرنیو چارو وزارت یو مقام سنجي ورما وویل چې دا ټول وړاندیزونه به نوي ډهلي ته استوي چې حکومت پرې غور وکړي.