د پاکستان کرکټ بورډ د یکشنبې په ورځ نومبر لسمه (لړم۲۰) وویل چې د هند کرکټ بورډ نه غواړي د چمپین ټرافي سیالیو لپاره خپله لوبدله پاکستان ته واستوي.
د چمپین ټرافي سیالۍ د ۲۰۲۵ کال د فبرورۍ په میاشت کې په پاکستان کې پیل کېږي. چمپین ټرافي د کرکټ د یوې ورځنیو نړیوالو سیالیو تر نړیوال جام وروسته دویم لوی نړیوال ټورنمنټ بلل کېږي.
د پاکستان د کرکټ بورډ ویاند سمیع الحسن د فرانسې خبري اژانس ته وویل: «د کرکټ نړیوالې شورا د پاکستان کرکټ بورډ ایمیل کړی چې د هند کرکټ بورډ خبر ورکړی چې لوبډله به یې د ۲۰۲۵ کال د چمپین ټرافي سیالیو لپاره پاکستان ته سفر نه کوي.»
د پاکستان د بورډ ویاند ویلي دي چې دا ایمیل یې د «مشورې او لاردښود ترلاسه کولو لپاره» د پاکستان حکومت ته استولی دی.
د پاکستان او هند ترمنځ سیاسي روابط ښه نه دي او د همدغو رابطو په اساس د دواړو هېوادونو ترمنځ د کرکټ دوې اړخیزې سیالۍ هم نه کېږي.
د هند کرکټ لوبډله په اخر ځل په ۲۰۰۸ کال کې د اسیا کپ په سیالیو د کې د ګډون لپاره پاکستان ته تللې وه او د پاکستان کرکټ لوبډلې تېرکال په نړیوال جام کې د ګډون لپاره هند ته سفر کړی و.
د پاکستان د کرکټ بورډ مشر محسن نقوي دا امکان هم رد کړی، چې په چمپین ټرافي کې دې د هند سیالۍ په درېیم هېواد، متحدو عربو اماراتو کې وشي.
نقوي د شنبې په ورځ خبریالانو ته وویل چې د پاکستان کرکټ بورډ په تېر وخت کې له هند سره د ښه نیت په اساس دا کار کړی، خو هر ځل امکان نه لري.
د پاکستان کرکټ بورډ ویلي دي چې که هند پاکستان ته سفر نه کوي، د پاکستان حکومت به پرېکړه کوي چې په اینده کې د پاکستان لوبډله هم هند ته د نړیوالو سیالیو لپاره ولاړه شي که نه.
ټاکل شوې وه چې د کرکټ نړیوالې شورا همدا اونۍ د چمپین ټرافي د سیالیو مهالوېش اعلان کړی وای، خو داسې ښکاري چې د هند له دغې پرېکړې وروسته د سیالیو د مهالوېش اعلان هم وځنډېږي.
د چمپین ټرافي په سیالیو کې افغانستان، پاکستان، هند، بنګله دېش، استرالیا، انګلنډ، جنوبي افریقا او نیوزلنډ برخه لري. افغانستان په لومړي ځل په دغو سیالیو کې ګډون لري.
فورم \ دبحث خونه