د لاس رسي وړ اتصالات

په ایران باندې د امریکا بندیزونه سبا عملي کیږي


د اسراییل صدراعظم ټرمپ د ایران پرضد د بندیزونو د لګولو په خاطر وستایو

په زرګونو ایرانیانو نن یکشنبې په تهران کې د امریکا د پخواني سفارت مخې ته د ۱۹۷۹ کال پاڅون کالیزه، بیا په مظاهرو ولمانځله. خو دا ځل په داسی حالت کې په مظاهرې وتلي چې ټاکل شوې ده چې د ایران پر ضد د امریکا د نفتو بندیزونه سر له سبا دوشنبې بیا پیل شي.

تیل، د ایران د عایداتو تر ټولو ستره منبع ده. د ٢٠١۵ کال نه راپدیخوا دا د امریکا تر ټولو کلک بندیزونه دي چې د ایران صادرات او مالي راکړه ورکړه به اغیزمنه کړي.

د ترمپ حکومت د جمعې په ورځ په ایران باندې د امریکا د هغو بندیزونو د لگولو اعلان وکړ چې په ۵ ٢٠١ کال کې د ایران او شپږ نړیوالو قدرتونو ترمنځ د اتمي معاملې د لاسلیک سره لرې شوي و.

ولسمشر ترمپ ویلي دا معامله د امریکا لپاره ډیره بده معامله وه او ایران به هیڅ کله اتمي وسلې ترلاسه نکړي.

د اسراییل صدراعظم بنیامین نتنیاهو پرون شنبې په یوه بیان کې ویلي چې له ولسمشر ټرمپه د دې تاریخي اقدام په خاطر مننه، بندیزونه په ریښتیا عملي کیږي.

ایراني چارواکي بیا وايي په ایران د امریکا بندیزونه یوه ناکامه هڅه ده. د ایران د پارلمان مشرعلي لاریجاني ولسمشر ترمپ د عراق د ډیکټاټور صدام حسین سره پرتله کړ او وې ویل چې هغه د ایرانیانو په تیره د ښځو او ماشومانو په وړاندې د جگړې اعلان کړې ده.

ایران د مخه لا د اقتصادي بحران سره مخ دی خو ایراني چارواکي هڅه کوي چې دغه بندیزونه کم اهمیته وښي. د ایران د پارلمان یو سخت دریځه غړی ابو فضل ابو ترابي وایي هیله لري چې دا بندیزونه به د امریکا لپاره یوه ستره ماته ثابته شي.

بل خوا نن په تهران کې د امریکا د سفارت د نیولو کالیزه ولمانځل شگع. د ایران د سپاه پاسداران انقلاب یو جنرال محمد علي جعفري لاریون کوونکو ته په وینا کې وویل په ایران باندې د امریکا د اقتصادي بندیزونو دسیسه او پلان به د خلکو د دومداره مقاومت له لارې ناکامه شي.

مظاهره کوونکو مرګ پر اسرائیل او مرده باد امریکا شعارونه ورکول.

په ۱۹۷۹ میلادي کال کې د امریکا پر سفارت د مظاهره چیانو له خوا برید وشو او د یو شمېر امریکايي ډیپلوماټانو برمته نیول د دې سبب شول چې واشنګټن له تهران سره خپلې ډیپلوماټیکې اړیکې پرې کړي.

د ۱۹۷۹ میلادي کال د نوومبر پر څلورمه نېټه وروسته له هغه چې امریکا د ایران اسلامي رژیم ته د پخواني شاه محمد رضا پهلوي له سپارلو انکار وکړ، ایراني محصلانو په تهران کې د امریکا پر سفارت ورغلل او د ۴۴۴ ورځو لپاره يې ۵۲ امریکايي ډیپلوماټان برمته وساتل.

له دې پېښې وروسته امریکا او ایران تر اوسه پورې په خپلو کې ډیپلوماټیک اړیکې نه لري.

XS
SM
MD
LG