ایراني چارواکي وايي له افغان حکومت سره یې د اوسپنې د معادونو د استخراج په اړه په خبرو کې پرمختګ شوی دی.
کابل وايي تهران په هرات کې د اوسپنې د یو معادن په استخراج کې د پانګونې غوښتنه کړې ده، خو وايي افغان حکومت یې په اړه فکر کوي.
د طلوع تلویزون د افغانستان د معادنو د وزیرې نرګس نهان له خولې ليکلي دي چې ایران غواړي د معادنو د استخراج وسایل افغانستان ته انتقال کړي، خو افغان حکومت تراوسه موافقه نه ده کړې.
د سنګان معادن د افغانستان او ایران ترمنځ سرحد کې دی، چې ایران وار دمخه د خپلې برخې معادن استخراج پیل کړی دی. میرمن نهان وايي ایران خامو مواد ته اړتیا لري او له همدې کبله په افغانستان کې د معادنو په استخراج کې پانګونې ته لیوال دی.
د همدغې میاشتې په پیل کې په کابل کې د ایران سفیر محمد رضا وویل چې له افغان حکومت سره په طبعي زیرمو کې د پانګونې په اړه خبرې کړي دي.
څه موده وړاندې امریکايي رسنیو هم د افغانستان د معادنو په استخراج کې د امریکايي شرکتونو د پانګونې په اړه راپورونه خپاره کړل.
امریکا او ایران له افغانستان پرته په ګڼو نړیوالو مسایلو کې ژور اختلافات لري او څرګنده نده چې افغان حکومت به د معادنو په چارو کې د دغو دواړو هیوادنو اقتصادي ګټې څه ډول انډولې کړي.
افغانستان چې په وچه کې ایسار هېواد دی، د طبیعي زیرمو له پلوه بډاې هېواد بلل کیږي. د امریکا د جیولیوجیکي سروې له مخې د افغانستان طبعي زیرمې شاوخوا یو تریلیون ډالر ارزښت لري.
د دغو طبعي زیرمو د استخراج لپاره یوشمېر نړیوالو شرکتونو او هېوادونو دلچسپي ښودلې ده، خو نا امني د دغو کانونو د سپړلو لپاره تر ټولو ستر خنډ بلل کیږي.