هغو وسله والو ډلو چې امریکا یې ملاتړ کوي ویلي دي د رقه ښار چې د اسلامي دولت ډلې یا داعش خپل پایتخت گاڼه نیولی دی.
د رقه ورزشي ستدیوم او ددې ښار ملکي روغتون د داعش وروستۍ مرچلې وې چې د عیني شاهدانو په وینا د سه شنبې په ورځ پرې د سوریې د دموکراتیکو قواو بیرغ اوچت شو.
په رقه کې د سوریې د دموکراتیکو قواو قوامدان روژده فلات، ویلي دي چې جگړه پای ته رسیدلې، خو د هغه په وینا کردي ځواکونه او عرب ملیشه د نیول شویو ځمکو نه د ماینونو په پاکولو بوخت دي او همداشان د داعش د پاته شونو پسې گرځي.
د سوریې د دموکراتیکو قواو ویاند طلال سیلو، ویلي چې د ماینونو له پاکولو او د ښار د بشپړه تصفیې وروسته به د رقه ښار د ازادۍ رسمي اعلامیه خپره شي.
داعش په روان میلادي کال کې په عراق او سوریې کې د خپلې واکمنۍ لاندې زیاتې سیمې بایللي دي، خو اوس هم ددې ډلې جنگیالي د فرات سیند په غاړو او د هغې په شاوخوا سحراو کې شته.
د سوریې دموکراتیک ځواکونه د امریکا په مشرۍ د نړیوال ایتلاف په ملاتړ د روان کال د جون د میاشتې راهیسې د داعش نه د رقه ښار د نیولو لپاره په جگړو بوخت وو.
عیني شاهدانو هم د رویترز اژانس ته ویلي چې د سوریې د دموکراتیکو ځواکونو جنگیالي په رقه کې خپل بریالیتوب لمانځي او په موټرو کې سپاره په سړکونو او کوڅو کې گرځي او شعارونه ورکوي.
د رقه ښار د بشپړه نیولو لپاره د سوریې د دموکراتیکو ځواکونو وروستني عملیات د یکشنبې په ورځ وروسته له هغې پیل شول چې د داعش زیات شمیر جنگیالیو د قبائیلي مشرانو سره د یوې معاملې له مخې له دې ښار نه ووتل او یواځې ٣٠٠ جنگیالي د ښار د وروستیو مرچلو د دفاع لپاره په رقه کې پاته شول.
د سوریې کردي جنگیالیو ویلي دي چې داعش په رقه کې د خپلو مرچلو نه له تیښتې دمخه هغه اسناد او وسلې چې له ځانه سره یې نشوای وړای، سوزولي دي.
په یوه بله ځانگړې پیښه کې د لبنان د حزب الله د ډلې د رسنیو یوې پوځي څانگې ویلي دي چې د سوریې پوځ د حزب الله په مرسته د سوریې د دیرالزور له ښار نه داعش ایستلی دی.
اوس یواځنی گڼ نفوسه سیمه چې د داعش په لاس کې ده د فرات د رود په شاوخوا او د دیرالزور د ښار په گاونډ کې سیمې دي چې ویل کې د داعش زیات شمیر جنگیالي هلته دیره دي.