د لاس رسي وړ اتصالات

خوست کې د زیات ولور په ضد مبارزه پیل شوې


مېرمن حنيفه خوست ښار ته نږدې له خپلې يواځنۍ لور سره د خپلوانو په کور کې ژوند کوي. هغې ډېره موده مخکې خاوند له لاسه ورکړی، ځکه خو يې د ژوند کولو ټول لګښت خپلوانو پرغاړه اخيستی دی.حنيفې څه موده مخکې خپله لور خوريي ته کوژده کړې وه، خو له دې کبله چې پيسې يې نه لرلې، يوه خيريه بنسټ يې د لوښو او جامو لګښت پرغاړه واخيست او هغه يې پرته له کومو مراسمو خُسرګنۍ ته رخصت کړله.

هغې وويل: ”درې مې خوريونه دي او درې مې خورځې دي، نور څوک نه لرم. زما ماشومه لور مې خوريي ته ورکړه، زه له دوی سره کور کې کور کې اوسېږم. خوريونه مې کراچۍ چلوي. ما د لور پيسې نه دي ورنه اخيستې او دوی دومره نه لرلې، چې ماته يې ترې د لور پيسې راکړې وای‟.

حنيفې اشنا راډيو ته وويل، چې که مرستندويه بنسټ يې لاسنيوی نه وای کړی، لور يې تش لاس د خاوند کور ته رخصت کوله. دې زياته کړه، چې د لور خاوند يې هم بې وسه او په ښار کې لاسي کراچي چلوي.

خوست کې د ولور کمه اندازه ۵۰۰ زره افغانۍ او تر ټولو لوړه کچه يې تر تر دوه ميليونو افغانيو زياته ده.
خوست کې د ولور کمه اندازه ۵۰۰ زره افغانۍ او تر ټولو لوړه کچه يې تر تر دوه ميليونو افغانيو زياته ده.

په پښتني ټولنه کې جګ ولور او په ودونو کې زيات لګښت نه يواځې ځوانان له ستونزو سره مخ کړي، بلکې تر ډېرې مودې د پلار په کور د نجونو د کېناستو لامل هم شوي دي.

د خوست ټولنيز او خيريه بنسټ چې د حنيفې د لور د واده لګښت يې ورکړی، هڅې پيل کړې دي، چې خلک د ولور او همدارنګه په ودونو کې د زيات لګښت پروړاندې مبارزې ته وهڅوي.

ددې بنسټ مشر اخترګل وفا وايي، کوښښ کوي، چې د جګ ولور مخه ونيسي او ځينو هغو نجونو ته چې کورنۍ يې بې وزله دي، د واده لګښت ورکړي. د ده په وينا تردې مخکې يې هم د يو شمېر ودونو لګښت ورکړی و.

اخترګل وفا وويل: ”هدف مو دادی چې د لوړ ولور اخيستل ټيټ کړو، ځينې رواجونه دي چې مختلف اجناس ورته اخيستل کيږي، موږ غواړو دا غيرضروري اجناسو اخيستل بند شي او ټولو ولسواليو ته دا کمپاين وغځوو‟.

که څه هم د خوست په يو شمېر سيمو کې د قومي جوړښتونو پراساس د ولور اندازه کمه ټاکل شوې، خومدني فعال سلطان محمود خيرخواه اشنا راډيو ته وويل، چې هيڅوک يې عملي کولو ته ژمن نه دي پاتې شوي.

  • 16x9 Image

    ابراهيم رحيمي

    ابراهيم رحيمي د خوست د شيخ زايد پوهنتون د ژورناليزم پوهنځی لوستی او د ژورناليزم په ډګر کې يوولس کاله تجربه لري. هغه د ۲۰۱۱ ميلادي کال راهيسې په جنوب ختيځ کې د امريکا غږ خبريال دی. دمخه يې د افغانستان دننه په يو شمېر رسنيو کې کار کړی دی.

XS
SM
MD
LG