امریکایان هر کال د مۍ میاشتې په وروستۍ دوشنبې د هغو امریکایانو یاد کوي چې په پوځ کې د خدمت پرمهال وژل شوي دي. دې ته د یادونې ورځ (Memorial Day) وايي.
د متحده ایالاتو ولسمشر جو بایډن او د هغه مرستیالې کاملا هریس دا کال د یادونې په ورځ پایتخت واشنګټن ته څېرمه د ارلنګټن په ملي هدیره کې د یو نوم ورکي سرتیري پر قبر د ګلانو ګیډۍ کیښوده.
بایډن وویل امریکایان باید هیڅ وخت هغه کسان هېر نکړي چې خپل ژوند یې د هیواد د ساتنې په لار کې قرباني کړی دی.
هغه زیاته کړه: "زموږ پوځیانو د دیموکراسۍ لپاره جګړه کړې او د ضرورت په وخت کې یې ژوند هم قربان کړی دی. نن ورځ د هغوی او د هغوی د کورنیو خدمت او قربانۍ د هغوی د قبرونو تر خاموشو تېږو ډېرې اوچتې دي."
په دې مراسمو کې د ولسمشر سره د دفاع وزیر لوید اسټن او لوی درستیز مایک ميلي هم ملګري وو. اسټن په دې مراسمو کې د وینا پرمهال، د پخوانیو پوځیانو او د هغوی له کورنیو د ملاتړ ژمنه وکړه.
هغه وویل: "موږ نن یو ځل بیا ژمنه کوو چې ډاډ رامنځ ته کړو تاسې او ستاسې کورنۍ هغه ملاتړ لري چې مستحق یې یاست. تاسې به تل زموږ د نظامي کورنۍ غړي یاست او موږ ټول هغه کسان په خپلو زړونو کې ساتو چې د هیواد د دفاع په لاره کې، چې مینه یې ورسره درلوده، ژوند له لاسه ورکړی دی."
د متحدو ایالتونو لوی درستیز مارک میلي وویل چې دا په امریکا کې د یادونې ۱۵۵مه کلیزه ده چې اوس یې د یوه میراث ارزښت غوره کړی دی.
نوموړي زیاته کړه: "په دې ورځ، موږ د هغو څه باندې یو میلیون امریکایانو یاد کوو چې د ازادۍ پر بستر یې خپل وروستي نفسونه وکاږل او د آزادۍ د ابدي ارمان ملاتړ یې وکړ. د تاریخ په اوږدو کې د هغوی پیاوړې ژمنتیا، او د آزادۍ لپاره د هغوی سرښندنې موږ ته خپله مقدسه دنده راپه یادوي."
د یادونې په ورځ په واشنګټن ډي سي کې د نظامي قطعاتو رسم ګذشت او پدې مراسمو کې د ارکستر د ډلو او متقاعدو پوځیانو حضور یو پخوانی دود دی.
د یادونې ورځ همدارنګه په متحدو ایالتونو کې د دوبي د پیل ورځ هم ګڼل کیږي، په کومه ورځ چې میلیونونه کسان له خپلو کورنیو سره د یوځای کیدو په موخه سفرونه کوي او یا هم د اونۍ په پای کې میلې کوي.