درې غیرې دولتي سازمانونو وایي څه باندې ۴۰۰ پناه غوښتونکي چې د لیبیا نه اروپایي هیوادونو ته روان وو او کښتۍ یې د بحر په منځ کې خرابې شوې وې، ژغورلي دي.
دغو سازمانانو ویلي چې پناه غوښتونکي په لرګینو کښتیو کې سپاره وه.
دې سازمانانو په ټویټر کې لیکلي چې د ژغورنې درې کښتیو ټوله شپه او تر سهاره پورې ۴۴۹ پناه غوښتونکي د ډوبېدو نه ژغورلي دي.
د اکثریت ژغورل شویو پناه غوښتونکو بدنونه د تیلو، کیمیاوي موادو او بحر د اوبو تر منځ د تعامل له وجې سوځیدلي دي.
وروسته تر هغه چې یو شمیر اروپایي هیوادونو خپل سرحدونه د پناه غوښتونکو او مهاجرینو پهمخ وتړل، اوس دغه خلک کوښښ کوي چې د لیبیا د لارې ځانونه اروپایي هیوادونو ته ورسوي.
د ملګرو ملتونو د مهاجرت اداره وایي چې یوازې د سږکال په لومړیو میاشتو کې اروپا ته په لاره ۱۱۴۶ پناه غوښتونکي د مدیترانیې په بحیرې کې مړه شوي.
بل پلو د پناه غوښتونکو د ژغورنې ادارې وایي چې د ۲۰۱۶ کال راپدیخوا یې څه باندې ۳۰زره کسان د مدیترانې په سمندرګي کې د ډوبېدو نه ژغورلي.
اکثریت دا کسان افریقایي او منځني ختیځ د هیوادونو اتباع دي چې د جګړو او بې وزلیو له کبله دغه خطرناک سفر ته زړه ښه کوي.