د لاس رسي وړ اتصالات

د لمر په لور د ناسا تاریخي ماموریت


د پارکر سولر په نامه د ناسا تحقیقاتي فضایي بېړۍ د توغیدو په حال کې

د امریکا د فضایي ادارې ناسا تاریخي ماموریت چې لمر ته ځان نژدې کړي نن د یکشنبې په سهار د فلوریدا ایالت له کپ کاناورل نه پیل شو.

د پارکر سولر په نامه د ناسا دغه تحقیقاتي فضایي بېړۍ به د لمر چاپیریال ته ځان ورسوي او د فضایي څیړنو په تاریخ کې به لومړنۍ بېړۍ وي چې دومره لمر ته نژدې کیږي.

دا فضایي بېړۍ چې د یو کوچني موټر په اندازه ده ١۴٠٠ پونډه وزن لري او سرعت یې په یو ساعت کې ۴٣٠٠٠٠ میله دی. دا په تاریخ کې تر ټولو چټکه فضایي بېړۍ ده.

لمر د ځمکې نه شاوخوا ١٥٠ میلیون کیلومتره واټن لري او دغه فضایي بېړۍ به په راتلونکو کلونو کې د لمر تر ٦ میلیون کیلومترۍ پورې ځان ورسوي.

ساینس پوهان وایي د لمر د بیحده تودخې سره سره به دغه تحقیقاتي وسیله سړه پاته شي او ساینس پوهانو ته به دا زمینه ورکړي چې لمر د بل هر وخت په پرتله له نژدې وڅیړي.

د امریکا فضایي ادارې ناسا د څو لسیزو راهیسې غوښتل چې د لمر چاپیریال ته یوه تحقیقاتي وسیله واستوي، خو داسې تکنالوژي یې نه درلودله چې فضایي څیړنیزه بېړۍ د لمر له تودوخې وژغوري.

ددغه ماموریت یو ساینس پوه ادام زیبو وایي "د موادو [د تولید] په پوهه کې وروستۍ پرمختیاوې مونږ ته داسې مواد راکوي چې فضایي بېړۍ له تودوخې وژغوري او نه یواځې دا چې د لمر د بیحده حرارت په وړاندې مقاومت وکړي بلکه یخه پاته شي".

ډاکتر یوجن پارکر نجومي فزیک پوه پدې تصویر کې ښکاري چې سپین کمیس یې اغوستی دی
ډاکتر یوجن پارکر نجومي فزیک پوه پدې تصویر کې ښکاري چې سپین کمیس یې اغوستی دی

د پارکر سولر تحقیقاتي بېړۍ د ناسا لومړنۍ ماموریت دی چې د یو ژوندي انسان په نوم یاد شوی دی. ډاکتر یوجین پارکر فزیک پوه دی چې په ١٩٥٨ کال کې یې د "لمر د باد" وړاندوینه وکړه. دغه فضایي بېړۍ به د لمر په چاپیریال کې د لمر د باد د سرعت ننداره وکړي چې ډاکتر پارکر یې وړاندوینه کړې وه.

XS
SM
MD
LG