د لاس رسي وړ اتصالات

د ناټو د دفاع وزیران نن د افغانستان په اړه غږیږي


د ناټو د دفاع وزیرانو په غونډه کې د امریکا دفاع وزیر او په افغانستان کې د قاطع ملاتړ ماموریت قوماندان هم برخه لري.

د شمالي اتلانتیک د سازمان ناټو د غړو هیوادونو د دفاع وزیرانو د دوهمې ورځې غونډه نن د بیلجیم په پایتخت بروسل کې پیل شوه.

ټاکل شوې د دې غونډې په ترڅ کې به ګډون کوونکي د افغانستان په مسله خبرې وکړي.

په دې غونډه کې د ګډون لپاره د افغانستان د دفاع وزارت سرپرست جنرال طارق شاه بهرامي په مشرۍ یو افغان پلاوی بروسل ته ورغلی دی.

ټاکل شوې چې په نننۍ غونډه کې به په افغانستان کې د ناټو د قاطع ماموریت، د افغانستان څخه بهر د افغان حکومت وسله والو مخالفانو ته د پناه ځایونو په مسله او هم د پاکستان سره د اړیکو د ساتلو د دوام پر مسلو خبرې وشي.

د ناټو په سازمان کې یوې سرچینې د نوم د نه ښودلو پر شرط امریکا غږ اشنا راډیو ته وویل چې د ناټو د دفاع وزیرانو په غونډه کې د دوو اسلامي هیوادونو قطر او متحده عربي اماراتو د دفاع وزیرانو هم ګډون کړی دی. د دغې سرچینې د وینا له مخې دا دواړه هیوادونه په افغانستان کې د ناټو په مشرۍ قاطع ملاتړماموریت کې ګډون ته لیواله دي.

خو غونډې په پای کې به دا څرګنده شي چې کوم هیوادونه د ناټو په مشرۍ د قاطع ماموریت لپاره څومره سرتیري برابرولی شي.

تیره ورځ د ناټو عمومي منشي اعلان وکړ چې افغانستان ته به تر دریو زرو پورې نوي سرتیري واستوي.

د ناټو عمومي منشي وویل چې یو شمیر هیوادونه چې د قاطع ملاتړ ماموریت کې غړیتوب نه لري هم به افغانستان ته خپل یو شمیر سرتیري واستوي.

د ناټو د دفاع وزیرانو په نننۍ غونډه کې د امریکا دفاع وزیر جنرال جمیز میټس هم برخه لري.

ټاکل شوې چې هغه به د دې غونډې د پریکړو په اړه نن غرمه خبریالانو ته معلومات ورکړي.

ټاکل شوې د امریکا د دفاع وزیر د خبري کنفرانس وړاندې د ناټو عمومي منشي د نننۍ غونډې پایلې په یو خبري کنفرانس کې له خبریالانو سره شریکې کړي.

د امریکا د دفاع وزیر وروسته به په افغانستان کې د ناټو په مشرۍ د قاطع ملاتړ ماموریت قوماندان جنرال جان نیکولسن او له هغه وروسته به د افغانستان د دفاع وزارت سرپرست جنرال طارق شاه بهرامي خبریالانو ته د ناټو د دفاع وزیرانو د غونډې د پایلو په اړه معلومات ورکړي.

تراوسه لا د ناټو د دفاع وزیرانو د غونډو پایلې څرګندې نه دي، خو طالبانو د دغه سازمان د عمومي منشي د چهارشنبې د ورځې څرګندونو ته غبرګون ښودلی دی.

د ناټو عمومي منشي د یو افغان خبریال د پوښتنې په ځواب کې ویلي وو چې طالبانو ته یې پیغام دادی چې ناټو به د افغان ځواکونو د روزلو لپاره په افغانستان کې پاتې شي.

طالبانو یو ویاند ذبیح الله مجاهد د خپل ټویټر په پاڼه لیکلي چې که د ناټو مشران هرڅومره په افغانستان کې د پاتې کیدو خبرې کوي نو په دې باید هم پوه شي چې هرڅومره چې پاتې کیږي همغومره دې په دې هیواد کې یوې اوږدې جګړې ته چمتو اوسي.

XS
SM
MD
LG