د قاطع ملاتړ ماموریت وایي تیره شپه د دغه ماموریت په یو پوځي مرکز برید کې یو بهرنی پوځي کارکوونکی او د قاطع ملاتړ اته ملکي قراردادیان وژل شوي دي.
د قاطع ملاتړ ماموریت په یو لنډ بیا ن کې پر پوځي مرکز د برید په اړه له زیاتو جزئیاتو او د وژل شوو کسانو د هویت له څرګندولو ډډه کړې ده.
دغه راز، د افغانستان د کورنیو چارو وزارت په یو بیان کې ویلي چې تیره شپه لس بجې د کابل د قصبې په سیمه کې د ځانمرګو بریدګرو یوې څلور کسیزې ډلې په دغه سیمه کې د بهرنیو ځواکونو په یو مرکز برید وکړ، چې د افغان امیتي ځواکونو لهخوا د بریدګرو په وژلو سره دا برید پای ته ورسید.
د کورنیو چارو وزارت په بیان کې ویل شوي چې په دغه برید کې د بهرنیو ځواکونو د پوځي مرکز لس افغان ساتونکي ټپيان شوي دي.
دا بیان وايي چې لومړی یو ځانمرګي بریدکوونکي له چاودیدونکو توکو څخه ډک موټر ته د بهرنیو ځواکونو د پوځې مرکز د دروازې مخې ته چاودنه ورکړه او پاتې بریدونکو پر دغه مرکز د سپکو او درنو وسلو ډزې پيل کړې، چې له افغان امنیتي ځواکونو سره له نښتې وروسته ووژل شول.
له دغه برید څخه درې ساعته مخکې د کابل ښار د پنځمې حوزې په افشارو سیمه کې د پولیسو اکاډمۍ مخې ته یوه پلي ځانمرګي بریدګر په ځان پورې تړلي چاودیدونکي توکي وچوول.
د پېښې عیني شاهدانو امریکا غږ ته وویل، دغه بریدګر د پولیسو یونیفورم په تن کړی وو او هغه مهال یې په خپل لاسي بکس کې ځای پر ځای شوو چاودیدونکو توکو ته چاودنه ورکړه، چې د پولیسو د اکاډمۍ محصلین دغې اکاډمې ته د ننوتلو لپاره په کتار کې ولاړ وو.
په کابل کې د پولیسو د روغتون نوکریوال ډګروال عبدالرزاق امریکا غږ ته وویل په دې برید کې ۲۷ محصلین وژل شوي.
ډګروال عبدالرزاق وویل "۲۷ محصلین وژل او ۲۱ نور ټپيان دي."
د دغه برید مسؤلیت وسلهوالو طالبانو په غاړه اخیستی دی.
له دغو دوو بریدونو دمخه د کابل ښار په شاهشهید سیمه کې په یو بل ځانمرګي برید کې ۱۵ تنه ملکي افغانان ووژل شول او تر ۴۰۰ نور ټپیان شوي دي.
د کابل د شاهشهید د دریم سړک په دغه برید کې، ځانمرګي بریدګر د چاودیدونکو توکو ډک له یوې لارې څخه په ګټې اخیستنې د ملي اردو د یو مرکز د دیوال د یوې برخې د لړنګیدو سربیره د دغه مرکز شاوخوا ته په لسګونو د استوګنې کورونه، اپارتمانونه، ورکشاپونه او دوکانونه نړولي دي.
ولسمشر غني د شاهشهید د پېښې د غندنې تر څنګ تیره شپه د پېښې ځای ته ورغی او په خپله یې د دغې چاودنې له امله پیښ شوی زیان وکوت او هم یې د دغې سیمې یو اوسیدونکي ته چې په برید کې یې د کورنۍ ۵ غړي وژل شوي، د دعا لاس پورته کړ.
افغان حکومت په کابل کې پر ملکي اهدافو د دغه برید د ترسره کولو هدف د ملا عمر د مرګ د خبر له خپریدو وروسته د طالبانو په مشرتابه کې د واک په سر د راپورته شوو لانجو څخه د خلکو د پام اړول ښودلي دي.
په کابل کې د حکومت د مخالفو وسلهوالو وروستیو بریدونو د مدني ټولنې د فعالینو او د عامو خلکو له کلک غبرګون سره مخ شوي دي.
دوی وايي، چې حکومت ته په کار دي ددغو پیښوعاملینو ته سزا ورکړي.