د ناټو عمومي منشي ینس ستولتنبرگ، د ناټو د سرمشریزې د پیل وړاندې خبري کنفرانس ته په وینا کې طالبانو ته په خطاب کې وویل، چې ناټو به په افغانستان کې پاتې شي او د افغان ځواکونو د روزنې، مشورې او ملاتړ ماموریت ته به دوام ورکړي.
ټاکل شوې د ناټو د غړو هیوادونو سرمشریزه نن د چهار شنبې په ورځ ( چنګاښ ۲۰ مه) د بلجیم په پایتخت د بروسل په ښارکې جوړه شي.
دا سرمشریزه به د پنجشنبې په ورځ به پای ته ورسیږي.
د ناټو د چارواکو د وینا له مخې ټاکل شوې، د افغانستان په اړه به د دغې ټولنې د غړو هیوادونو مشران د پنجشنبې د ورځې په غونډه کې خبرې وکړي.
دا چارواکي وايي په دې غونډه کې به د ۲۰۲۰ کال وروسته د افغان امنیتي ځواکونو سره د دغې ټولنې د مرستو په دوام هم خبرې وشي.
ناټو له وړاندې ویلي، چې افغان امنیتي ځواکونو د روزنې او مشورې لپاره به افغانستان ته شاوخوا درې زره روزونکي واستوي.
د ناټو عمومي منشي ینس ستولتنبرگ، خبریالانو ته وویل، چې په افغانستان کې به د دغې ټولنې غیرې نظامي مامور یت چې ناټو یې د روزنې او مشورې ورکولو ماموریت بولي، افغانستان ته د مالي ملاتړ سره یوځای دوام ومومي.
هغه وویل، په افغانستان کې د ثبات د ټینګیدو لپاره دا ډول مرستو دوام ته اړتیا ده.
ښاغلي ستولتنبرگ وویل " طالبانو ته زما پیغام دادی، چې هغوی د جګړې په ډګر کې بریالیتوب نه شي ترلاسه کولی، خو که چیرې هغوی خبرو ته حاضر شي لاس ته راوړنه به یې ډیره وي".
د افغانستان جمهور رئیس محمد اشرف غني او اجرائیه رئیس عبدالله عبدالله د ناټو په سرمشریزه کې د ګډون لپاره په جلا جلا الوتکو کې بروسل ته رسیدلي دي.
د افغانستان جمهوري ریاست د یو خبر له مخې جمهور رئیس غني په بروسل کې نن له غرمې مخکې د ناروې د صدراعظمې میرمن ایرنا سولبرګ سره کتلی دي.
د ارګ اعلامیه وایی، په کتنه کې دواړو مشرانو د دوه اړخیزه همکاریو د پراختیا، دسیمه ییزو مسایلو، انکشافي پروژو، د امنیت د تامین او د سولې پروسې په اړه بحث او خبرې کړې دي.
د ناروې صدراعظمې د افغانانو په رهبرۍ او مالکیت د سولې پروسې د ملاتړ ترڅنګ د جمهور رئیس له لوري د اوربند د نوښت د قدردانۍ ترڅنګ وویل، هېواد یې د اوبو د مدیریت او د سولې د مذاکراتو په برخه کې هر ډول همکارۍ ته چمتو دی.
د ارګ د اعلامیې له مخې جمهور رئیس غني د ناروې صدراعظمې ته ویلي، په حکومت کې د رهبرۍ په بېلابېلو برخو او د سولې په پروسه کې ښځې رول لري او د سولې مذاکره کوونکي پلاوي کې به هم ښځو ته مهمه ونډه ورکړل شي.
د ناټو په سرمشریزه کې د ګډون لپاره د دغې ټولنې د غړو هیوادونو د حکومتونو مشران بروسل ته ورغلي دي.