د لاس رسي وړ اتصالات

کرونا ویروس؛ افغانستان کې ۸۲۰۰ روغتیايي کار کوونکي واکسین شوي


په افغانستان کې د کرونا ویروس د ټولو مثبتو پېښو شمېر ۵۵۷۳۳ ته پورته شو

د افغانستان د عامې روغتیا وزارت وایي، په دغه هیواد کې د کرونا ویروس ضد واکسین بهیر روان دی او تر دا مهاله څه باندې ۸۲۰۰ روغتیايي کار کوونکي واکسین شوي دي.

د روغتیا وزارت ویاندې معصومه جعفري نن یکشنبه فبروري ۲۸ (کب لسمه) خبریالانو ته وویل چې دغه روغتیايي کار کوونکي په ۳۴ ولایتونو کې واکسین شوي دي.

نوموړې زیاته کړه چې د روغتیايي کار کوونکو ترڅنګ د کرونا ویروس ضد واکسین افغان امنیتي سرتیرو او رسنیو کار کوونکو ته هم ورکول کیږي چې په وینا یې شمېر معلوم نه دی.

په افغانستان کې د کرونا ویروس ضد واکسین د تطبیق بهیر د روانې کب میاشتتې پر پنځمه په ارګ ماڼۍ کې د خاصو مراسمو په ترڅ کې پيل شو.

روغتیا وزارت ویلي چې د هند هیواد مرسته شوی ۵۰۰ زره ډوزه کرونا ضد واکسین سره به ۲۵۰زره کسان واکسین کړي.

په افغانستان کې د کرونا ویروس تازه مثبتې پېښې

د افغانستان د عامې روغتیا وزارت په تیرو ۲۴ ساعتونو کې د هیواد په یو شمېر ولایتونو کې د کروناویروس د ۱۹ مثبتو پېښو د ثبتېدو او د یوه کس د مړه کېدو خبر ور کړی دی.

روغتیا وزارت نن یکشنبه فبروري ۲۸ (کب لسمه) ویلي چې په تېرو ۲۴ ساعتونو کې د کرونا ویروس د ۱۸۷۸ مشکوکو سمپلونو معاینات کړي چې په وینا یې ۱۹ یې مثبت او پاتې منفي وو.

د یاد وزارت د معلوماتو په اساس په دې سره په افغانستان کې د کرونا ویروس د ټولو مثبتو پېښو شمېر ۵۵۷۳۳ ته پورته شو.

په تیرو څلورویشت ساعتونو کې په افغانستان کې د کرونا ویروس له امله د یو تن د مړینې راپور ورکړل شوی چې په دې اساس د کرونا له امله د ټولو مړو شوو کسانو شمېر ۲۴۴۴ تنو ته لوړ شو.

د افغانستان د عامې روغتیا وزارت زیاتوي چې د دې ترڅنګ ۴۵ تنه بیرته له کرونا څخه جوړ شوي چې په دې سره هم د ټولو بیرته روغ شوو کسانو شمېر ۴۹۳۳۳ تنو ته لوړ شو.

کروناویروس د لومړي ځل لپاره د ۲۰۱۹ کال کې د چین د هوبي ایالت په ووهان ښار کې پیدا او وروسته ټولې نړۍ ته خپور شو.

د امریکا د جانس هاپکینز پوهنتون د معلوماتو په اساس تر دا مهاله په ټوله نړۍ کې څه باندې ۱۰۰ میلیونه کسان په کرونا ویروس اخته شوي او څه باندې دوه میلیون نور ورڅخه مړه شوي دي.

XS
SM
MD
LG