د لاس رسي وړ اتصالات

د روسیې او اوکراین په تازه خبرو کې د پام وړ پرمختګ ندی شوی


د فبروري د ۲۴ مې راپدیخوا چې روسیې په اوکراین یرغل کړی، د دواړو هیوادونو درې ځله خبرې کړي.
د فبروري د ۲۴ مې راپدیخوا چې روسیې په اوکراین یرغل کړی، د دواړو هیوادونو درې ځله خبرې کړي.

د اوکراین د جمهور رئیس یو سلاکار میخایلو پودولیاک وایي د روسیې سره د دوشنبې مارچ ۷ ( کب۱۶) په خبرو کې څه ناڅه پرمختګ شوی خو زیاتوي چې د جګړې د پای ته رسیدو لپاره په خبرو کې د پام وړ پرمختګ ندی شوی.

ښاغلي پودولیاک په ګاونډي هیواد بیلاروس کې د خبرو په هکله وویل، " د بشري دهلیزونو د لوژستیک په برخه کې ځیني واړه مثبت تغیرات راغلي". خو د اوکراین دې چارواکي پدې هکله نور جزیات ورنکړل.

دا دهلیزونه پدې خاطر جوړیدل چې ملکیانو ته اجازه ورکړل شي په خوندي توګه د جګړې د سیمو څخه وتښتي.

سره لدې چې روسیې د دوشنبې په ورځ محدود اوربند اعلان کړی و چې د کلا بند شویو ښارونو څخه د اوکراینیانو په خوندي توګه د وتلو سره مرسته وشي خو راپورونه وایي چې تیره شپه هم په اوکراین د روسیې د توغندیو ډزې نه وې بندې شوې.

سره لدې چې د اوکراین چارواکو د خبرو د بل پړاو څه ندي ویلي خو د روسیې یو مرکچي د دې هیواد سرکاري تلویزیون ته ویلي چې د خبرو بل پړاو به ژر پیل شي.

د روسیې دې مرکچي لیوند سلتوسکي ویلي، " د خبرو څلورم پړاو به ډیر ژر په بیلاروس کې وشي. کره نیټه یې نشم ویلی خو ښایي سبا به معلومه شي".

مسکو د اوکراین څخه غوښتي و چې په جګړو کې ګیر پاتې شوي اوکراینیان دې مسکو یا بیلاروس ته پریښودل شي خو اوکراین دا غوښتنه رد کړې او د هیواد غربي سیمو او یا هم د اروپایي اتحادیې هیوادونو ته یې د ملکیانو د پریښودو غوښتنه کړې.

د فبروري د ۲۴ مې نیټې راپدیخوا چې روسیې په اوکراین یرغل کړی د دواړو هیوادونو مرکچیانو درې ځله په ګاونډي هیواد بیلاروس کې خبرې کړي.

دا خبرې پداسې حال کې کیږي چې د متحده ایالاتو د بهرنیو چارو وزیر انټوني بلنکین په روسیې غږ کړی چې په ملکیانو دې بریدونه بند کړي.

ښاغلي بلنکین د لیتویا د بهرنیو چارو د وزیر سره په ګډ خبري کنفرانس کې وویل، "خوراکي موادو او درملو ته اجازه ورکړئ. خلک پریږدئ چې په خوندي توګه ووځي او په اوکراین جګړه بنده کړئ".

XS
SM
MD
LG