پاکستان د افغان محصلینو لپاره د طب او غاښونو د زده کړو اړوند بهیر ځنډولی او پوهنتونونو ته یې امر کړی چې د افغان محصلینو داخله او شمولیت، د محصلینو انتقال او نورې علمي اسانتیاوې ودروي.
دا پرېکړه د پاکستان د طبي شورا کړې چې په دغه هېواد کې د طبي زده کړو تنظیموونکې اداره ده. ددې ادارې تر لارښوونې وروسته د لاهور د روغتیايي علومو پوهنتون له لارې ټولو اړوندو ادارو ته پدې اړه خبر ورکړ شوی دی.
د دې پرېکړې له مخې، د دوه زره شپږ ویشتم او دوه زره اووه ویشتم تعلیمي کال پر مهال به د طب یا ایم بي بي اېس او د غاښونو د طب یا بي ډي اېس په پروګرامونو کې نوي افغان محصلین نه شاملېږي او نه به له نورو پوهنتونونو څخه د هغوی د انتقال غوښتنې منل کېږي.
پوهنتونونو ته همداراز ویل شوي چې د افغان محصلینو د وتلو اړوند اداري چارې بشپړې کړي او د پرېکړې د عملي کولو راپورونه په څلورویشت ساعتونو کې وړاندې کړي.
دغه پرېکړه یوازې پر نویو درخواست کونکو اغېز نه کوي، بلکې هغه افغان محصلین هم له ستونزې سره مخ کوي چې لا دمخه په پاکستان کې په طبي او د غاښونو په برخه کې د طب په پوهنځي کې په زده کړو بوخت دي.
په پاکستان کې سلګونو افغانانو د بورسونو، د دواړو هېوادونو د متقابلو پروګرامونو او شخصي شاملېدو له لارې طبي زده کړې کړې دي. د طالبانو له بیا واکمنېدو وروسته، په دوه زره یوویشتم کال کې، یو شمېر افغان محصلینو د زده کړو د دوام لپاره پاکستان ته پناه یووړه.
د لاهور د روغتیايي علومو پوهنتون چې په پنجاب کې له څه باندې یو سل او شل طبي او د غاښونو د برخې زده کړې، ازموینې او داخلې چارې تنظیموي، خپلو اداري دفترونو ته سپارښتنه کړې چې د افغان محصلینو د بېرته ستنېدو اسناد برابر کړي.
د دې پرېکړې له اعلان وروسته د هغو افغان محصلینو لپاره اندېښنې زیاتې شوې چې لا هم په پاکستان کې دي، په ځانګړي ډول هغه کسان چې په افغانستان کې د ښځو پر زده کړو د محدودیتونو او د لوړو زده کړو د ممانعت له امله له هېواده وتلي دي.
د بشري حقونو او د زده کړو د برخې فعالانو مخکې هم خبرداری ورکړی چې په ګاونډیو هېوادونو کې د افغانانو پر لوړو زده کړو محدودیتونه کولی شي د جګړې او سیاسي بې ثباتۍ له امله بېځایه شویو ځوانانو ته د زده کړو فرصتونه نور هم کم کړي.
پاکستان تر اوسه د هغو افغان محصلینو لپاره چې د دې پرېکړې له امله اغېزمن کېږي، کوم بدیل پروګرام نه دی اعلان کړی.
دا هم لا روښانه نه ده چې ایا هغه محصلین به له دې پرېکړې مستثنا وي او که نه چې لا دمخه په زده کړو بوخت دي او یا د فراغت وروستیو پړاوونو ته رسېدلي دي.
فورم \ دبحث خونه