د لاس رسي وړ اتصالات

پاکستان بیا ټیک ټاک بند کړ


دا دریم ځل دی چې په پاکستان کې ټیک ټاک بندیږي.

په پاکستان کې چارواکو نن پنجشنبه جولای ۱ (چنګاښ ۱۰) د ویډیو د شریکولو مشهوره ټولنیزیه شبکه، ټیک ټاک بنده کړله.

د ټیک ټاک یواستازي او ګڼ شمیر کاروونکو د فرانس پریس خبري اژانس ته ویلي چې حسابونه نشي پرانیستلی.

په پاکستان کې په ټیک ټاک تور دی چې "غیرې اخلاقي" مواد پکې خپریږي خو دا شرکت وایي چې د پاکستان د حکومت او عامو خلکو په غوښتنې یې یوازې پدې تیرو دریو میاشتو کې څه باندې ۶ میلیونه ویډیوګانې د پاکستان لپاره د ټیک ټاک د خدمتونو د برخې نه پاکې کړي.

ټیک ټاک ویلي چې په اکثریت پاکو شویو ویډیوګانو کې "د بالغو بربنډتوب او جنسي فعالیتونه" وو.

د لنډو ویډیوګانو د شریکولو دا ټولنیزه شبکه دوه ځلې مخکې هم په پاکستان د "غیرې اخلاقي" شیانو د خپرولو په تور بنده شوې وه خو وروسته دې شرکت ژمنه وکړله چې خپاره شوي مواد به په سمه توګه څاري.

د ټیک ټاک یو شمیر کارونکو د حکومت پریکړه غندلې او هغه یې "غیرې منطقي" بللې. دوي وایي چې زرګونه کسان پدې شبکې کې خپل تولیدات نورو ته ورښیي او د همدې لارې خپل کاروبار پر مخ وړي.

په پاکستان کې یو شمیر خلکو تیره میاشت د ټیک ټاک پر ضد مظاهرې هم کړې وې او ادعا یې کوله چې پدې شبکې کې د "همجنسبازۍ" د ترویج اړوند مواد خپریږي.

ټیک ټاک په یوې اعلامیې کې ویلي چې په پاکستان کې په سیمه ایزو ژبو د څار ظرفیت یې لوړ کړی او د هغو موادو په خلاف به اقدام کیږي چې د ټولنې د لارښوونو خلاف وي.

ټاکل شوې د ټیک ټاک د راتلونکې په هکله د همدې میاشتې په ۸مه بیا په محکمې کې بحث وشي او تر همدې نیټې به دا شبکه په پاکستان کې بنده وي.

XS
SM
MD
LG