ټاکل شوې چې هند او پاکستان د کرکټ د اتلانو جام په روانو سیالیو کې د یکشنبې په ورځ د عربي متحده اماراتو د دوبۍ په نړیوال لوبغالي کې مخامخ شي.
د پاکستان روزنکی عاقب جاوید چې پخپله یې هم د ملي لوبډلې پخوانی تیز توپ اچونکی تیر شوی وایي چې د هند په مقابل کې به تیز توپ اچوونکي د لوبې په ګټلو کې مهم نقش ولري.
هند خپله لومړۍ لوبه له بنګله دیش ګټلې خو پاکستان بیا په نیوزلینډ بایللې او د پاکستان لوبډله د نیمه پای لوبې تګ لپاره باید د یکشنبې ورځې لوبه له هند وګټي.
سره لدې چې د پاکستان دریو تیز توپ اچوونکو، شاهین شاه افریدي، نسیم شاه او حارث روف د نیوزلینډ سره په لوبې کې په ۳۰ اورونو کې ۲۱۴ منډې ورکړې وې خو عاقب جاوید وایي چې د هند سره په لوبې کې به دا لوبغاړي ښه وځلیږي.
هغه زیاته کړه، " مونږ درې متخصصین او تر ټولو غوره توپ اچوونکي لرو".
عاقب جاوید دا درې واړه تیز توپ اچوونکي د وسیم اکرم، وقار یونس او خپل ځان سره پرتله کړل چې په ۱۹۹۰ لسیزه کې د پاکستان د کرکټ لوبډلې د ملاتیر بلل کیدل.
هغه وویل چې د هند په مقابل کې لوبه ځانګړی حس لري او زیاته یې کړه چې دا درې تیز توپ اچوونکي ښایي یوه ځانګړې کارنامه وکړي.
سره لدې چې پاکستان د دې لوبو کوربه دی خو د هند لوبډلې د امنیتي دلایلو له کبله پاکستان ته له ورتګ انکار وکړ او پریکړه وشوه چې د هند ټولې لوبې به د دوبۍ په نړیوال لوبغالي کې کیږي.
فورم \ دبحث خونه