د پاکستان د پوځ ویاند جنرال اصف غفور د امریکا غږ ته ویلي چې د افغانستان سره په پوله په "حساسو سیمو کې" به د روان کال تر دسامبر پورې کتارې ولگول شي او په پاتې برخې به د کتارو لگولو کار د ٢٠١٩ کال تر دسامبر پورې بشپړه شي.
د افغانستان سره د شاوخوا، ٢٦١١ کیلو متره سرحد باندې د کتارو لگولو ستره پروژه د پاکستان د پوځ په مشرۍ یو کال مخکې پیل شوه. خو پاکستاني چارواکي وایي د سرحد هغه سیمې یې په نښه کړي دي چې د هغوی په وینا ترهگر ترې د تگ راتگ لپاره غیر قانوني استفاده کوي او افغان امنیتي ځواکونه هم پدغو سیمو کې ډیر لږ حضور لري.
خو د افغانستان د دفاع وزارت ویاند جنرال رادمنش امریکا غږ ته ویلي چې په ډیورنډ کرښه د ازغن تار او نورو موانعو لګولو سره د ترهګرۍ مخه نه نیول کیږي. هغه زیاته کړه چې که د پاکستان حکومت په رښتیا هم د افغانستان، سیمې او نړۍ له امنیت سره مرسته کوي او په دې اړه شویو ژمنو ته پابند وي، په خپله خاوره کې دې د ترهګرو مرکزونه وتړي او د هغوی له تمویل او ملاتړ نه دې لاس واخلي.
ښاغلي رادمنش ویلي دي چې "په ډیورنډ کرښه د ازغن تارلګول، د کانالونو کیندل او د سرتیرو ځای پرځای کول دا یوازې نمایشي حرکتونه دي."
بلخوا د قبایلو سرتاسري شورا مشر زرجان شنیواري د امریکا غږ ډیوه رادیو ته ویلي چې "قبایل په ډیورنډ کرښه د ازغن تار له لګولو سره مخالف دي او دا مخالفت یې له دې امله دی چې د کټارو په لګیدو سره د قبایلو یوه کورنۍ په دوو برخو ویشل کیږي."
پاکستاني مقاماتو ویلي دي چې د ډیورند په کرښه د امنیتي موانعو د جوړولو کار په زغرده روان دی او د هغوی په وینا د سرحد په اوږدو کې امنیتي پوستو جوړول ددغو موانعو او کتارو د لگولو یوه برخه ده.
د پاکستان د پوځ ویاند هغه رپوټونه رد کړل چې وایي پاکستان غواړي د افغانستان سره په پوله ۶۰ زره سرتیري ځای پر ځای کړي، خو هغه وویل چې پدې سرحد باندې د موانعو د جوړولو له بشپړیدو وروسته د هغې د امنیت د نیولو چارې به ددې هیواد سرحدي قول اردو ته وسپارل شي چې یوه د پاکستان د پوځ یوه برخه ده.
جنرال غفور همداشان زیاته کړه چې ددې کار لپاره به دغې قول اردو ته نور سرتیري هم استخدام شي.