د لاس رسي وړ اتصالات

عاطف مشعل لېرې او عزیزالله فضلي د کرکټ بورډ مشر شو


جمهور رئیس غني د کرکټ بورډ لپاره نوی مشر په داسې حال کې ټاکلی، چې د افغانستان ملي ټیم په اماراتو کې په مسابقو بوخت دي

د افغانستان ولسمشر محمد اشرف غني په یو حکم کې د افغانستان د کرکټ بورډ اوسنی مرستیال عزیز الله فضلي د دغه بورډ نوی رئیس ټاکلی.

ارګ په یوه اعلامیه کې، چې د چهارشنبې په ورځ (۲۸ مه) خپره شوې ویلي چې عزیز الله فضلي به د دغه بورډ د پخواني رئیس شکر الله عاطف مشعل پر ځای د بورډ غړی او رئیس وي.

عاطف مشعل شاوخوا دوه کاله د کرکټ بورډ د ريس په توګه دنده ترسره کړه.

د نوموړي پر ځای په داسې وخت د کرکټ بورډ لپاره نوی رئیس ټاکل کیږي چې د افغانستان د کرکټ ملي لوبډلې یو شمېر لوبغاړو پر دغه بورډ دتوپیري چلند تورونه پوري کړي.

د افغانستان د کرکټ ملي لوبډلې لوبغاړو نورعلي ځدراڼ او شاه پور ځدراڼ څو ورځې وړاندې وروسته له هغه چې د افغانستان غوره لیګ په بولیو کې وانخیستل شول پر کرکټ بورډ تورونه پورې کړل چې ګواکې له دوی سره توپیري چلند کیږي.

خو د افغانستان کرکټ بورډ دا ادعاوې ردوي او وايي چې په اې پي ایل کې د لوبغاړو اخیستل د دوی نه بلکې د لوبډلو د څښتنانو صلاحیت دی.

د افغانستان غوره لیګ چې د راتلونکې اکتوبر میاشتې پر پنځمه به په متحده عربي اماراتو کې پېل شي، پنځه لوبډلې لري او د بهرنیو لوبغاړو تر څنګ ۹۰ افغان لوبغاړي په کې بولۍ ته وړاندې شوې ول.

د افغانستان د کرکټ ملي لوبډلې د لوبغاړو او کرکټ بورډ تر منځ ناندرۍ کومه نوې خبره نه ده. د افغانستان د کرکیټ ملي لوبډله دا مهال په متحده عربي اماراتو کې د اسیا جام په سیالیو کې لوبیږي.

افغانستان د تېرې دوشنبې په ورځ په خپله لومړۍ لوبه کې د اسیا جام پنځه ځلې ګټونکي سریلانکا ته ماته ورکړه، او د دې سیالیو دویم پړاو ته یې لار پیدا کړه.

افغانستان سبا د پنجشنبې په ورځ له بنګلادېش سره خپله دویمه لوبه لري. لا دقیقه معلومه نه ده چې ښاغلی مشعل ولې له دندې لېرې شو.

XS
SM
MD
LG