د افغانستان ولسمشر محمد اشرف غني وايي د اصلاحاتو د راوستلو او د ځوانو افسرانو د پرمختیا د زمینې برابرولو لپاره یې، د افغان پوځ د ۱۶۴ جنرالانو د تقاعدې اسناد لاسلیک کړي دي.
ښاغلي غني د یکشنبې په ورځ د ټویټر په یو پيغام کې وویل "د افسرانو د ذاتي چارو قانون د عملي کیدو لپاره، ما د ۱۶۴ جنرالانو احترامانه تقاعد لاسلیک کړ. موږ اصلاحات د جګړې او سولې د ګټلو لپاره غواړو، اصلاحات یوازې د اصلاحاتو لپاره نه غواړو، دا بهیر به زموږ د روښانه راتلونکي لپاره دوام ومومي".
له دې وړاندې د افغانستان د دفاع وزارت له امریکا غږ آشنا سره په خبرو کې تائید کړې وه، چې د افسرانو د ذاتي چارو د نوي قانون پر بنسټ به په دغه وزارت کې ۷۰ فیصده جنرالان تقاعد ته سوق او ۳۰ فیصده برحاله جنرالان به په خپلو دندو کې پاتې شي.
د دغه وزارت د چارواکو پر وینا، د افسرانو د ذاتي چارو په نوي قانون کې د ستر جنرال لپاره ۶۲، ډګر جنرال لپاره ۶۰، تورن جنرال لپاره ۵۸، برید جنرال لپاره ۵۶ او ډګروالانو لپاره ۵۴ کاله د تقاعد عمر ټاکل شوی دی.
د افغانستان د دفاع وزارت ویاند جنرال دولت وزیري د روان کال په عقرب میاشت کې امریکا غږ ته ویلي وو، چې د افسرانو د ذاتي چارو نوی قانون به په دریو پړاونو او اتلسو میاشتو کې عملي شي.
د دفاع وزارت پریکړه کړې، چې په لومړي پړاو کې د احطیاط د دورې افسرانو ته تقاعد ورکړي او په دویم پړاو کې چې د ۱۳۹۷ کال له اسد څخه پیلیږي او د همدې کال تر جدي دوام کوي، د زیات عمر لرونکو افسران تقاعد ته سوق کړي.
د دغه وزارت د معلوماتو له مخې په وروستي پړاو کې، چې د ۱۳۹۷ کال له جدي څخه پيل او د ۱۳۹۸ کال تر اسد پورې دوام کوي، په کې به دغه قانون پر ټولو هغو فسرانو تطبیق شي، چې عمرونه یې تقاعد ته برابر شوي وي.