د متحدو ایالتونو ولسمشر ډونالډ ټرمپ نن دوشنبه (اکتوبر۱۹) د امریکایي میرمنو د روغتیا د ښه والي لپاره یو اجرائیوي فرمان لاسلیک کړ، چې عنوان یې «د ژوند په ټولو پړاوونو کې د پایلو د ښه کولو لپاره د ښځو د روغتیا ښه کول» دي.
ولسمشر ټرمپ دا فرمان په سپینې ماڼۍ کې په هغو ځانګړو مراسمو کې لاسلیک کړ چې میرمن یې میلانیا ټرمپ هم په کې وه.
د ولسمشر دغه نوی اجرائیوي فرمان د متحدو ایالتونو د روغتیا او بشري سرچېنو له وزارت څخه غواړي چې د علمي څېړنو د تقویې، د روغتیايي لاس ته راوړنو د بهیر چټک کولو او د امریکايي نجونو او ښځو د روغتیا د ښه کولو لپاره په دریو میاشتو کې د روغتیا په ملي انستیتیوت کې د ښځو د روغتیا څانګه جوړه کړي.
په دې پلان کې د روغتیا په ملي انستیتیوت کې د یوې ځانګړې څانګې جوړول او د سپینې ماڼۍ د کاري ځواک جوړول هم شامل دي چې موخه یې د طبي څیړنې پراخول او د ښځو لپاره د روغتیا خدماتو ښه کول دي.
په دې اړه د سپينې ماڼې په یوې اعلامیې کې ویل شوي دي چې «دا روغتیایي کاري ځواک به د ښځو د روغتیا د ښه کولو لپاره فدرالي هڅې همغږي کړي، چې د ماشومتوب او ځوانۍ له پړاوونو څخه پیل، د زیږون د کلونو، منځني عمر، د حیض او تر سالم زړښت پورې مودې» په کې شاملې دي.
دا صحي ابتکار د ښځو د روغتیا په مختلفو اړخونو لکه د مور روغتیا، رواني روغتیا، د زړه ناروغۍ او دا ډول نورو ناروغیو په معالجې باندې تمرکز کوي. او یوه بله مهمه برخه یې د طبي څیړنې ګړندۍ کولو، د ناروغیو تشخیص او نوې درملنې جوړول او په دې لارو چارو کې د نوې تکنالوژۍ او زبر ځیرکتیا کارول شامل دي.
د ولسمشر میرمن میلانیا ټرمپ په دې برخې کې مخکښ رول لوبولی دی. هغې دا کار د امریکايي ښځو د روغتیا د ښه والي په برخه کې یو تحول یاد کړ او ویې ویل چې دا فرمان به په متحدو ایالتونو کې د ښځو د وضعیت د لا ښه والي په اوه نوی معیار وټاکي.
نوموړې ویلي دي چې د ښځو د کارځواک لومړنۍ غونډه به د دوشنبې په ورځ وشي. هغې د دغې کاري ډلې له غړو څخه وغوښتل چې په خپلو چارو کې د ښځو او نجونو د صحت د ښه والي په اړه د هغې د ابتکار لومړیتوبونه په پام کې ونیسي.
ولسمشر ټرمپ د مراسمو په یوه بله برخه کې خپله میرمنه وستایله او زیاته یې کړه چې میلانیا سخت کار کوي او په لنډ وخت کې یې ډیر څه ترلاسه کړي دي.
فورم \ دبحث خونه