د متحده ایالاتو پایتخت واشنګټن ډي سي ته څېرمه د جمعې په ورځ، جنوري ۳۱ (سلواغه ۱۲)، د هغې مسافر وړونکې الوتکې او پوځي هلیکوپتر د پاتې شونو لټون دوام درلود چې د چهارشنبې په شپه یې په هوا کې ټکر وکړ او ۶۷ کسان پکې ووژل شول.
څېړونکو وویل چې د پوټامیک په سیند کې د مسافر وړونکې الوتکې "تور بکس" موندل شوی دی. دا الوتکه د واشنګټن ډي سي ترڅنګ په رونالډ ریګن هوايي ډګر کې د کښته کېدو پر مهال له یوې پوځي هلیکوپتر سره وجنګېدله او دواړه الوتکې سیند ته ولوېدلې.
د اطفائیې چارواکي وايي د تحقیقاتو لپاره د الوتکې د نورو برخو لټون دوام لري.
امریکن هوايي شرکت تائید کړې چې له کنزاس ایالت څخه پایتخت واشنګټن ته په تلونکې الوتکې کې ۶۰ مسافر او څلور عمله ناست وو. د امریکا پوځ هم وايي چې د دوی په بلک هاک ډوله څرخي الوتکې کې درې تنه سپاره وو.
فدرالي او محلي چارواکو پنجشنبې وویل چې په دواړو الوتکو کې د ۶۷ کسانو څخه هیڅوک ژوندي ندي پاتې شوي.
دا پېښه واشنګټن ډي سي ته څېرمه د رونالډ ریګن هوايي میدان ترڅنګ د ویرجینیا ایالت په ارلینګټن کې رامنځته شوې ده. د هوايي چلند د فدرالي ادارې د یو داخلي راپور له مخې، د پیښې پر مهال د هوايي ډګر د څار په ټاور کې یو کس ته دومره کار سپارل شوی و چې په عادي حالت کې دوه کسان یې کوي.
په راپور کې ویل شوي چې د پیښې"وخت او د ترافیک حجم ته په کتو، د موقعیت ترتیب نورمال نه و."
ولسمشر ډونالډ ټرمپ د پنجشنبې په ماسپښین دوه اجرائیوي فرمانونه لاسلیک کړل. د یو له مخې، د هوايي چلند د فدرالي ادارې لپاره مرستیال ټاکل شوی او د بل له مخې، له هوایي چلند څخه د فدرالي تنوع نوښت لمنځه وړل شوی دی.
په سپینه ماڼۍ کې ددغو فرمانونو د لاسلیک کولو پر مهال ټرمپ پرته له شواهدو یو ځل بیا دا ادعا تکرار کړه چې د فدرالي تنوع برنامې ښايي د الوتکو په ټکر کې رول لرلی وي.
د متحده ایالتو د ترانسپورت وزیر شان ډفي په پیښې په اړه د پنجشنبې په سهار له ټرمپ سره په مشترک مطبوعاتي کنفرانس کې وویل چې دواړه الوتکې له ټکر وړاندې "د الوتنې په معیاري" مسیر روانې وې.
په دغه مطبوعاتوي کنفرانس کې ټرمپ د پیښې د قربانیانو په یاد د یوې شیبې چوپتیا غوښتنه وکړه او ویې ویل چې د ژغورنې د چارو سره د مرستې لپاره ټولې محلي، ایالتي او فدرالي سرچینې ځانګړې شوي دي.
هغه وویل چې د ترانسپورت د خوندیتوب ملي بورډ د پیښې د علت معلومولو په اړه د تحقیقاتو مشري کوي چې د هوايي چلند فدرالي اداره او د پوځ د هوايي چلند د څېړنو قطعه هم پکې ګډون لري.
ټرمپ همدارنګه ادعا وکړه چې د پخوانیو ولسمشرانو بارک اوباما او جو بایډن حکومتونو د هوايي چلند لپاره د خلکو د ګمارنې معیارونه ټیټ کړي وو او ددې کار لامل یې د فدرالي حکومت د برابرۍ او شمولیت نوښتونو وبلل. ټرمپ زیاته کړه چې تېره اونۍ یې د یو فرمان په ترڅ کې دغه نوښتونه لمنځه یوړل.
د هوايي ترافیک د کنټرول کوونکو په اړه ټرمپ وویل: "موږ ترټولو تکړه، هوښیار او ګړندي خلک غواړو. موږ داسې څوک غواړو چې له رواني پلوه بشپړ وي او دا هغه څه دي چې موږ به یې لرو."
د پنجشنبې په ورځ، په کانګرس کې د تورپوستو وکیلانو یوې ډلې په یوه اعلامیه کې، په ټکر کې د خلکو په مړینه خواشیني وښودله او د ټرمپ پر هغو څرګندونو یې نیوکه وکړه چې وايي، د تنوع نوښتونو ښايي په غمیزه کې رول لرلی وي.
د متحده ایالاتو د دفاع وزیر پیټ هګست د پنجشنبې په ورځ وویل چې د متحده ایالاتو د اردو هلیکوپتر یوه روزنیزه الوتنه کوله چې په ترڅ کې یې "په خواشینۍ سره، یوه تېروتنه وشوه... د ارتفاع په برخه کې ستونزه وه او موږ په چټکۍ سره په دې اړه تحقیقات پیل کړل."
د ترانسپورت وزیر ډفي وویل چې مسافر وړونکې الوتکه له ټکر وروسته په درې برخو ماته شوې او د سیند اوبو ته لوېدلې ده.
د واشنګټن د اطفائیې د ادارې مسئول جان ډانلي د پنجشنبې په سهار وویل چې شاوخوا ۳۰۰ ژغورونکي د پیښې ځای ته رسېدلي چیرې چې د الوتکو پاتې شونې موندل شوي او د شپې په تیاره کې د ۲.۵ متره ژور سیند په سړو اوبو کې د ژوندي پاتې شویو کسانو لټون ته یې دوام ورکړی دی.
هغه وویل چې باد او د اوبو څپو د الوتکو پاتې شونې په سیند کې د پیښې له ځای څخه تر دوو کیلومترو لیرې لیږدولي دي.
تراوسه د مسافر وړونکې الوتکې د سپرلیو د ۲۸ کسانو مړي او د هلیکوپتر د درې پوځیانو جسدونه له اوبو څخه ایستل شوي دي.
دا پیښه د سپینې ماڼۍ په څو کیلومترۍ کې د هوايي چلند په داسې یوه سیمه کې رامنځته شوې چې د نړۍ په کچه یې سخت کنترول کیږي.
متقاعد امریکايي پیلوټ او د هوايي چلند د سلاکارانو د موسسې اجرائیوي رئیس راس ایمیر امریکا غږ ته وویل چې هغه د رونالډ ریګن هوايي ډګر د پیلوټانو لپاره د نړۍ له ترټولو ډیر بوختو هوايي ډګرونو په کتار کې ګڼي چې یو لامل یې د هوايي ډګر په شاوخوا د هلیکوپترو پروازونه دي.
د متحده ایالاتو په سنا کې د ویرجینیا دواړو سناتورانو، ټیم کېن او مارک وارنر، په یو مطبوعاتي کنفرانس کې وویل چې د څو کلونو په اوږدو کې یې د واشنګټن په فضا کې د الوتکو د تراکم په اړه غږ اوچت کړی دی خو دواړو زیاته کړه چې، او ددغې موضوع د راپورته کولو وخت ندی.
دواړو سناتورانو وویل چې د پیښې په اړه د نورو جزئیاتو د معلومولو لپاره د ترانسپورت د خوندیتوب ملي بورډ تحقیقاتو ته انتظار باسي.
په دې الوتکه کې د نورو مسافرو سربیره، د امریکا د فیګر سکېټینګ (د یخ په سر نڅا) ادارې ویلي چې د هغوی د ټیم یو شمېر لوبغاړو، د هغوی روزونکو او د کورنیو ځینو غړو هم سفر کاوه.
د ادارې په یوه خبرپاڼه کې ویل شوي: "موږ ددې غمیزې او له کبله یې د رامنځته شوې نه ډکېدونکې تشې له کبله سخت غمجن شوي یو. د قربانیانو کورنۍ زموږ په زړه کې دي. "
کرملین او د روسیې رسنیو ویلي چې د یخ په سر د نڅا روسۍ جوړې، ایوجینا شیشکووا او وادیم ناوموف، او ددې لوبې ځینو نور روسي لوبغاړو هم په دغه الوتکه کې سفر کاوه. ټرمپ وویل چې روسیې یې د هغوی د مړو په ستنولو کې به مرسته وکړي.
دا د ۲۰۰۱ راهیسې په امریکا کې ترټولو خونړۍ د هوايي چلند پېښه ګڼل شوې ده. په هغه کال د نیویارک په بیل هاربر کې د امریکن ایرلاین د یوې الوتکې د لوېدو په پېښه کې ۲۶۰ کسان مړه شول.
ددې راپور ځینې معلومات له اسوشیتد پرس، فرانس پرس او رویټرز اژانسونو څخه اخیستل شوي.
فورم \ دبحث خونه