د اوکراین چارواکو د پنجشنبې په ورځ (اکتوبر ۸) وویل چې پر دغه هېواد باندې د روسیې د توغندیو او بې پیلوټه الوتکو په تازه بریدونو کې لږ تر لږه ۳۲ کسان وژل شوي او صنعتي تأسیساتو او د انرژۍ بنسټونو ته زیان رسېدلی دی.
تر ټولو درانه تلفات د اوکراین په شمالي ښار پریلوکي کې رامنځته شوي، چیرې چې د مسئولینو په خبره، د روسیې د توغندي په یو برید کې د استوګنې یوه پنځه پوړیزه ودانۍ ویجاړه شوې ده.
د اوکراین د بیړنیو خدماتو ادارې ویلي چې د پنجشنبې تر سهاره په پریلوکي کې د وژل شویو شمېر ۲۲ کسانو ته رسېدلی دی. همدارنګه، د پلازمېنې کیف کې د استوګنې په یوه ودانۍ کې چې تر برید لاندې راغلې وه، دوه نور مړي موندل شوي، او ورسره په کیف کې په یوه ورځ کې د وژل شویو شمېر څلورو کسانو ته لوړ شوی دی.
د کورنیو چارو وزیر ایوان ویهیفسکي تر دې مخکې ویلي وو چې په ټول هېواد کې د بریدونو د قربانیانو شمېر ۲۸ کسانو ته رسېدلی، چې په هغو کې ۲۰ کسان یوازې د پریلوکي په برید کې وژل شوي وو، او پنځه ماشومان هم پکې شامل وو.
د اوکراین ولسمشر ولادمیر زیلینسکي وویل چې د روسیې د وروستیو بریدونو په نتیجه کې په ټول اوکراین کې شاوخوا ۱۰۰ کسان ټپیان شوي هم دي.
د روسیې د دفاع وزارت ویلي چې ځواکونو یې د کیف او د اوکراین د نورو سیمو پر پوځي او دفاعي صنعتي تاسیساتو «پراخ برید» ترسره کړی دی. د وزارت په وینا، په دې عملیاتو کې له ځمکې، سمندر او هوا څخه توغېدونکي د لوړ دقت لرونکي وسلې او همدارنګه بې پیلوټه الوتکې کارول شوې دي.
د اوکراین هوايي ځواک ویلي چې د روسیې له لوري توغول شویو ۴۶ جېټ انجن لرونکو بېپیلوټه الوتکو څخه یې څه باندې ۸۰ سلنه نسکورې کړې دي. د اوړي له پیل راهیسې، روسیې د دغو نوو چټکو بېپیلوټه الوتکو کارول زیات کړي دي.
فورم \ دبحث خونه